पर्यटनपाखें ६९ अर्ब आम्दानी

येँ – सन् २०१८ दछिया दुनें नेपालं पर्यटन क्षेत्रं जक ६९ अर्ब ७५ करोड ५८ लाख आम्दानी जूगु खँ धाःगु दु । थ्व आम्दानी वंगु दँय् स्वयां १७ प्रतिशतं अप्वः जूगु खँ धाःगु दु । सन् २०१७ य् ५८ अर्ब ५२ करोड ६९ लाख तका आम्दानी याःगु खः । थ्व आम्दानी धाःसा थ्वयां न्ह्यःया दँ २०१६ या तुलनाय् ४० प्रतिशतं अप्वःगु खः ।

उगु दँय् ४१ अर्ब ७६ करोड पाँच लाख आम्दानी जूगु खः । सन् २०१८ य् नेपाः वःपिं पर्यटकतय् औसत बसाइ अवधि १२.४ न्हु दुगु खः । पर्यटकतय्सं न्हि ४४ डलरया ल्याखं खर्च याःगु खः । थगुने धाःसा पर्यटकतय् औसत बसाई अवधि १२.६ न्हु दुगु खः । सन् २०१८ य् ११ लाख ७३ हजार ७२ म्ह विदेशी पर्यटक नेपाः दुहां वःगु खः, गुगु थ्वयां न्ह्यःया दँया तुलनाय् २४.७७ प्रतिशतं अप्वःगु खः ।

सन् २०१७ य् ९ लाख ४० हजार २१८ म्ह विदेशी पर्यटक नेपाः दुहां वःगु खः । अथेहे २०१८ य् नं नेपाः दुहां वःपिं पर्यटकत मध्ये भारत व चीनया पर्यटक हे अप्वः दत । थ्व दँय् नेपालय् दकलय् अप्वः पर्यटक दुहां वःगु न्यागू देय्या धलखय् छसिकथं भारत, चीन, अमेरिका, बेलायत व श्रीलंका लाःगु दु ।

भारतपाखें सन् २०१८ य् १ लाख ९४ हजार ३२३ म्ह, चीनं १ लाख ५३ हजार ६३३ म्ह, अमेरिकां ९१ हजार ८९५ म्ह, बेलायतं ६३ हजार ४६६ म्ह व श्रीलंकां ६९ हजार ६४० म्ह पर्यटक नेपाः दुहां वःगु खः । नेपालय् दुहां वइपिं पर्यटकत अप्वः थें बिदा न्ह्यायेकेत, न्ह्यइपुकेत व धर्मकर्मया निंतिं वयेगु यानाच्वंगु दु ।

सन् २०१८ य् ७ लाख ३ हजार ८३४ म्ह बिदा न्यायेकेत, १ लाख ८७ हजार ६९२ म्ह धार्मिक ज्याया निंतिं नेपाः दुहां वःगु खँ संस्कृति, पर्यटन तथा उड्डयन मन्त्रालयं पित बिउगु प्रतिवेदन न्ह्यथनातःगु दु । थौंकन्हय् साहसिक पर्यटनयानिंतिं नं यक्व हे पर्यटक नेपाः दुहां वयेगु यानाच्वंगु दु ।

सम्बन्धित बुखँ

LEAVE YOUR COMMENTS