पूर्वाधार विकासय् झिगू अर्ब हइगु

एनएआरएनया बैठक

येँ – गैरआवासीय नेपाली संघ (एनआरएनएं) पूर्वाधार विकासया निंतिं झिगू अर्बया लगानी दुत हयेत अभियान न्ह्याकीगु जूगु दु । थुकिया निंतिं एनआरएनएया नवनिर्वाचित अध्यक्ष कुमार पन्तया संयोजकत्वय् छगू समिति दयेकूगु दु । नकतिनि क्वचाःगु निर्वाचन लिपा च्वंगु न्हापांगु अन्तर्राष्ट्रिय समन्वय परिषद्या बैठकं लछिया दुने कार्ययोजना दयेकाः न्ह्यब्वयेगु कथं थुगु समिति गठन याःगु खः ।

बैठकं श्रमिक कल्याकारी कोष दयेकेगु निंतिं छगू करोड खुगू लाखया ग्वाहालि नं बीगु जूगु दु । वैदेशिक रोजगारीइ वनाच्वंपिं पीडित ज्यामितय्त ग्वाहालि यायेगु निंतिं थ्व कोष दयेकेत्यंगु खः । एनआरएनएया अध्यक्ष पन्तया प्रस्तावय् नवनिर्वाचित पदाधिकारी व दुजःपिंसं कोषया निंतिं ध्यबा बीत्यंगु खः ।

कोषया ध्यबा निश्चित मापदण्ड दयेकाः खर्च याइगु खँ धाःगु दु । बैठकं एनआरएनएं न्हापा न्ह्याकाच्वंगु ज्यायात निरन्तरता बीगु क्वःछिसें नेपाल भ्रमण वर्ष २०२० अभियानय् ग्वाहालि यायेगु निंतिं निवर्तमान अध्यष भवन भट्टया संयोजकय् छगू समिति नं गठन याःगु खः ।

बैठक लिपा पित बिउगु वक्तव्यय् एनआरएनएया येँय् च्वंगु सचिवालय् चुस्त दयेकेगु निंतिं महासचिव डा. हेमराज शर्माया नेतृत्वय् छगू समिति दयेकूगु व संस्थाया आर्थिक प्रतिवेदन तयार यायेत कोषाध्यक्ष महेश श्रेष्ठया संयोजकत्वय् समिति गठन जूगु खँ नं धाःगु दु ।

बैठकं न्याम्ह उपाध्यक्षया नेतृत्वय् न्यागू विभाग (वैदेशिक रोजगार, परोपकारी तथा मानव कल्याण, व्यापार तथा लगानी, पिस ज्ञान व नवप्रवद्र्धन नेपाल प्रवद्र्धन) दयेकेगु व विभागया अन्तर्राष्ट्रिय समन्वय परिषद्या दुजः व सम्बन्धित क्षेत्रया विज्ञपिं च्वनीगु व्यवस्था नं याःगु दु ।

अथेहे एनआरउन विज्ञ सम्मेलनया निक्वःगु संस्करण सन् २०२० य् यायेगु व संस्थाया वइगु क्षेत्रीय सम्मेलन मध्यपूर्वय् यायेगु निर्णय नं बैठकं याःगु दु ।

अथेहे बैठकं एनआरएनएया संरक्षक परिषद्या दुजः ल्यसें परिषदया प्रमुख संरक्षकय् डा. शेष घले व मेपिं संरक्षकय् पुलांपिं अध्यक्षत देवमान हिराचन व जीवा लामिछाने, निर्वतमान अध्यक्ष भवन भट्ट व पुलांम्ह संरक्षक रामप्रताप थापायात तःगु दु । अथेहे संस्थापक अध्यक्ष डा. उपेन्द्र महतोयात उच्च वरियताय् तयेगु नं क्वःछिउगु दु ।

भ्रमण दँया निंतिं समझदारी

येँ –  नेपाल सरकारं आकिवं न्यायेकेत्यंगु भ्रमण दँ २०२० या निंतिं नेपाल भ्रमण वर्ष २०२० सचिवालय व गैर आवासीय नेपाली संघ दथुइ पर्यटन प्रवद्र्धन यायेगु समझदारी जूगु दु । भ्रमण वर्षया राष्ट्रिय संयोजक सुरज वैद्य व एनआरएनया नवनिर्वाचित अध्यक्ष कुमार पन्त दथुइ झिंन्हय्गू बुँदाया समझदारीपत्रय् हस्ताक्षर जूगु खः ।

थुगु समझदारी कथं विदेशय् च्वनाच्वंम्ह छम्ह नेपाःमि छम्ह विदेशीयात भ्रमण वर्षबलय् नेपाः छ्वयेगु अभियान न्ह्याकीगु जुइ । थुकिया अभिलेखीकरण सचिवालय व संघ याइगु जुइ । अथेहे भ्रमणवर्षया इलय् एनआरएनपाखें विश्वन्यंकं जुइगु औपचारिक सेमिनार, गोष्ठी थेंज्याःगु ज्या नेपालय् हे वया याःवयेगु व्यवस्था याइ ।

विश्वन्यंकं च्वनाच्वंपिं गैरआवासइ िनेपालीतय्त सन् २०२० य् बिदा नेपालय् हे पासा व छेँजःपिनि नाप हनेगु अभियान न्ह्याकी । अथेहे संघं विदेशय् च्वंगु नेपाली दूतावास व नियोगय् भ्रमण वर्ष प्रवद्र्धन कक्ष स्थापना यायेत आवश्यक जनशक्ति उपलब्ध याकी । भ्रमण वर्षया प्रचार प्रसारया निंतिं सचिवालयया समन्वयय् संघं दछियंकं विश्वया मू मू शहरय् कार व साइकल ¥याली याइ ।

अथेहे संघं विश्वन्यंकं दुगु नेपाःमितय् व्यावसायिक फर्म, होटल, रेष्टुराँय् नेपाल सम्बन्धी आकर्षक प्रचार सामग्रीतय् प्रचार प्रसार यायेगु ज्या याइ । अथेहे म्होतिं नं न्यय्गू देशय् मिस एआएन इन्टरनेशनल ज्याझ्वः यायेगु व फाइनाल २०२० या जुनय् नेपालय् याइगु जूगु दु ।

अथेहे संघं थीथी देशया सञ्चार माध्यमय् डिजिटल मार्केटिङ्गया व्यवस्था यायेगु ज्या याइ । अथेहे संघं विश्वन्यंकं थीथी देय्या सावर्जनिक थाय् बस स्टेशन, रेल्वे स्टेशन व प्रमुख पर्यटकीय क्षेत्रय् नेपाल भ्रमण वर्ष २०२० या प्रचार सामग्री इनेगु, प्रवद्र्धनात्मक कार्यक्रम संचालन यायेगु याइ ।

 

सम्बन्धित बुखँ

LEAVE YOUR COMMENTS