सामसुङया नाफा म्हो जुल

येँ – सामसुङ्ग इलेक्ट्रोनिक्सया थ्व दँय् नं लबः तसकं कुहां वनीगु जूगु दु । सामसुङं पितबिउगु अन्तिम चौमासिकया लबः २९ प्रतिशतं म्हो जूगु खः । वंगु निदँ दुने कम्पनीया थ्व दकलय् तःधंगु गिरावट जूगु खँ धाःगु दु । चिनियाँ स्मार्टफोनतय् दथुइ यायेमाःगु प्रतिस्पर्धा व स्मार्टफोनया भाः धमाधम म्हो जुया वनाच्वंगु कारणं सामसुङ्गया लबः म्हो जुया वनाच्वंगु खँ धाःगु दु ।

विश्वया हे दकलय् अप्वः स्मार्टफोन व मेमोरी कार्ड उत्पादन याइगु सामसुङ्गं छुं दँ न्ह्यवनिसें उच्च नाफा नयाच्वंगु खःसां वंगु निदँ न्ह्यवनिसें नाफा म्हो जुया वनाच्वंगु खः ।सामसुङ्ग वंगु प्यलाया अवधि दुने १० प्रतिशतं विक्री म्हो जूगु खँ नं धाःगु दु । कम्पनीं उत्पादन याःगु मेमारी कार्डया विक्री म्हो जूगुलिं नं नाफा म्हो जूवंगु खँ धाःगु दु ।

मेमोरि कार्डया व्यापारिय् खनेदुगु कठीन स्थितिं यानाः सन् २०१९ या न्हापांगु चौमासिकय् नं कम्पनीया आम्दानी म्हो जुइगु खँ धाःगु दु ।
दक्षिण कोरियाया अर्थतन्त्रय् हे प्रभाव लाकीगु सामसुङ इलेक्ट्रोनिक्सया बजाः चिब्या जुयावंलिसे शेयर बजारय् नं लिच्वः लानाच्वंगु दु । मंगलवाः जक सामसुङया शेयर कारोवार शून्य दशमलब ५ प्रतिशतं म्हो जूगु खः ।

मोबाइल फोन निर्माता आइफोनया आम्दानी नं म्हो जुया वनाच्वंगु दु । वंगु वालय् जक आइफोन दयेकीगु एप्पल कम्पनीं विक्री म्हो जुया वनाच्वंगु रिपोर्ट न्हयब्वःगु खः । अमेरिका व चीन दथुइ जुयाच्वंगु व्यापारि युद्धया कारणं नं एप्पल चीनय् थःगु उत्पादनया विक्री म्हो जुइगु प्रक्षेपण यानातःगु दु ।