स्वनिगःया सुरक्षा सीसी क्यामराय्

स्वनिगः दुनेया सुरक्षाया निंतिं जक २१,४४१ गू थासय् सीसी क्यामरा जडान यायेमाःगु आवश्यक जूगु खनेदु । महानगरीय प्रहरी ज्याकू रानीपुखुलिं नकतिनि जक याःगु छगू अध्ययनकथं येँय् ९,११७, ख्वपय् ५,९८५ व यलया ६,३३९ थासय् सीसी क्यामरा तयेमाःगु खनेदुगु खः । महानगरीय प्रहरी ज्याकूया प्रमुख नापं प्रहरी नायब महानिरीक्षक शैलेश थापा क्षेत्रीं स्वनिगलय् छम्ह मनू पूर्णरुपं सुरक्षित जुयाच्वनेत द्वलंद्वःया ल्याखय् क्यामरा जडान यायेमाःगु आवश्यक दुगु धयादी ।

‘थ्व आः तत्काल सम्भव मदु, ताःई लिपा उगु क्यामरा जडान यात धाःसा स्वनिगः पूर्णरुपं सुरक्षित जुइ’, वय्कलं धयादी । छम्ह मनू राज्यया निगरानीइ हरेक इलय् च्वनाच्वनेगु निंतिं उगु सीसी क्यामरा आवश्यक जूगु वय्कःया धापू दु । ज्याकुथिं याःगु अध्ययनकथं हे सीसी क्यामरा जडान जुल धाःसा स्वनिगलय् प्रहरी जनशक्ति नं थप यायेमालीगु आवश्यकता खनेमदु । थौंकन्हय् स्वनिगलय् ५२९ गः सीसी क्यामरा तयातःगु दु ।

उकीमध्ये ४६० गः क्यामरा चालु अवस्थाय् दु । येँय् ४०३, यलय् ३३ व ख्वपय् २४ थासय् सीसी क्यामरा जडान यानातःगु दु । प्रहरीं समुदाय–प्रहरी साझेदारी ज्याझ्वः अन्तर्गत थीथी स्थानीय तहलिसे समन्वय यानाः तत्काल आवश्यक जूगु थासय् सीसी क्यामरा जडान यायेगु ज्यातकं न्ह्याकेधुंकूगु दु ।

स्वनिगः दुने थौंकन्हय् २१ गू स्थानीय तह दु । हरेक स्थानीय तहय् प्रहरी ज्याकूतकं स्थापना जुइधुंकूगु दु । अथे हे स्वनिगलय् जुइगु अपराधया घटनायात तत्काल संबोधन यायेत धासें चय्छगू थासय् कन्ट्रोल रुम भेहिकल (सीआरभी) तयातःगु दु । उगु सीआरभी भेहिकलं घटना जुइके मबीत व घटना जु हे जुल धाःसां नं तत्काल घटनास्थलय् थ्यंकः वनाः अनुसन्धान व दोषीयात ज्वनेगु ज्या यानाच्वंगु दु ।

ज्याकूया कथं येँय् न्यय्प्यंगू, ख्वपय् झिंछगू व यलय् झिंखुगू सीआरबी भेहिकल तयेगु व्यवस्था यानातःगु खःसां नं थौंकन्हय् येँय् पीन्यागू, ख्वपय् झिंछगू व यलय् झिंन्यागू सीआरबी भेहिकलया व्यवस्था यानातःगु दु । स्वनिगलय् २०६३ सालंनिसें सीआरबी भेहिकलपाखें सुरक्षा बीगु शुरु याःगु खः ।

जनसंख्या अप्वया वंलिसें थप चय्छगू थासय् सीआरबी भेहिकल थप यायेमाःगु खनेदु । ज्याकुथिं याःगु अध्ययनय् येँय् पीगुंगू, ख्वपय् झिगू व यलय् नीनिगू थासय् सीआरबी भेहिकल आवश्यक खने दुगु खः । स्वनिगलय् थौंकन्हय् झिंच्यागू प्रहरी वृत्त व स्वंगू परिसरपाखें मुद्दा चले जुया वयाच्वंगु दु । थ्व बाहेकं ज्याकूनिसें चौकीतक १६७ गू इकाइपाखें सुरक्षा बिया वयाच्वंगु दु ।

ज्याकूया प्रवक्तालिसें प्रहरी वरिष्ठ उपरीक्षक पूजा सिंहं स्वनिगःया झिंच्यागू थासं प्रहरी ज्याकू थप यायेत माग जुया वयाच्वंगु धयादी । ‘येँय् प्यंगू, यलय् गुंगू व ख्वपय् प्यंगू थासय् प्रहरी ज्याकू स्थापना यायेत धासें माग वयाच्वंगु दु ।’ वय्कलं धयादी ।

मुख्य सहरयात केन्द्रीत यानाः सुरक्षा योजना दयेकूसां नं लिपांगु इलय् जूगु बस्ती विकासया कारणं गांगामय् तकं प्रहरी ज्याकू स्थापना यायेमाःगु आवश्यक खने दया वयाच्वंगु दु । येँय् ११,३१९ प्रहरी अधिकृत व जवानया दरबन्दी दुसां थौंकन्हय् ९,३९८ म्ह जक कार्यरत दुगु ज्याकुथिं न्ह्यथंगु दु ।