संकटय् लाःम्ह लामिछानेया मन्त्री जुइगु इच्छा

येँ (नेपालभाषा टाइम्स)- सहकारीया ध्यबा तयाः ग्यालेक्सी टिभीया शेयर न्याःगु व लिपा ध्यबा लित मबिउगु कारणं यानाः सहकारी डुबे जूगु धकाः द्वपं लानाच्वंम्ह रास्वपाया अध्यक्ष रवि लामिछानें आः सरकारय् दुहां वनेगु मनस्थिति दयेकूगु खँ सीदुगु दु ।

थौंकन्हय् प्रचण्ड नेतृत्वया सरकारय् दुथ्याःगु जनमत पार्टी सरकारं पिहां वइगु चर्चा जुयाच्वंगु दु । यदि जनमत पार्टी सरकारं पिहां वल धाःसा उकिया थासय् थःपिं सरकारय् दुहां वनेगु धकाः रवि लामिछानें बिचाः यानाच्वंगु खँ सूत्रतय्सं धाःगु दु ।

खास यानाः थौंकन्हय् थः विरुद्ध जुयाच्वंगु आक्रमणपाखें बचे जुइगु लागिं रास्वपा सरकारय् वनेमाःगु आवश्यकता महसुस याःगु खँ नं धाःगु दु ।

ग्यालेक्सी टिभी चायेकूगु इलय् सहकारीया ध्यबा लिकयाः शेयर न्याःगु खँ पिहां वयेवं पार्टी सभापति रवि लामिछाने पिने जक मखु, आः पार्टी दुने नं आलोचनाया शिकार जुया वःगु खँ सीदुगु दु । पार्टी दुने डा. स्वर्णित वाग्ले समर्थित पुचलं थ्व विवाद समाधान मजूतले लामिछानें सभापति पदं राजीनामा बियाः अलग्ग निं च्वंसा जिउ धकाः सल्लाह समेत बियाहःगु खँ सीदुगु दु ।

लामिछानें थःगु धापू स्पष्ट यायेत म्हिगः याःगु पत्रकार सम्मेलनय् पत्रिका व पत्रकारतय्त ब्वः बियागु खँय् क्षमा समेत फ्वनादीगु दु ।

सम्बन्धित बुखँ

LEAVE YOUR COMMENTS