शिक्षक माग यासें सिसडोलय् फोहोर वायेगु बन्द
येँ -स्वनिगःया फोहोर वायेगु केन्द्र जुयाच्वंगु सिसडोल ल्याण्डफिल साइटया स्थानीय जनतां अवरोध पिकायेवं येँय् हानं फोहोर मुनेज्या बन्द जूगु दु । थ्व समस्यां यानाः वंगु खुन्हु न्ह्यवंनिसें येँय् फोहोर मुनेगु ज्या जुइ फयाच्वंगु मदुनि ।
सिसडोलया स्थानीय जनतां वंगु चैत १३ गतेनिसें थीथी माग तसें आन्दोलन यायेवं अन फोहोर वायेगु ज्या बन्द जूगु खः । अनया फोहोरमैला प्रभावित क्षेत्रया शिक्षक व्यवस्थापन संघर्ष समितिं प्रभावित क्षेत्रया थीथी स्कुलय् ५१ गू शिक्षक दरबन्दी थपे यायेमाःगु, प्रभावित क्षेत्रया सकलें विद्यार्थीतय्त माध्यमिक तह तकया शिक्षा निःशुल्क यायेमाःगु थेंज्याःगु माग न्ह्यःने तयाः थ्व आन्दोलन शुरु याःगु खः ।
उमिगु मागयात कयाः येँ महानगरपालिका प्रमुख विद्यासुन्दर शाक्य लगायत थीथी पदाधिकारीपिंलिसे थीथी चरणय् वार्ता जुयाच्वंगु दु ।
कामपा वातावरण विभागया प्रमुख हरिकुमार श्रेष्ठया कथं स्थानीयतय्सं ५१ म्ह शिक्षक दरबन्दी माग यानाच्वंगुली २० गू दरबन्दी थपे यायेत येँ मनपां स्वीकृति बीधुंकूगु दु । वय्कलं थ्व सकस्यां मंकाः समस्या जूगुलिं समाधानय् ग्वाहालि यायेत सिसडोलया स्थानीय जनतायात नं इनाप यानादीगु दु ।
प्रमुख श्रेष्ठं कनादीकथं स्थानीय बासिन्दाया माग बारे कामपा, नेपाल सरकार, शिक्षा तथा विज्ञान प्रविधि मन्त्रालयलिसे समन्वय यानाः सहलह न्ह्याकेधुंकूगु दु । लिसें वय्कलं आः साइटय् फोहोर यंके फइगु अवस्था मदुगुलिं छेँय् छेँय् म्हो जक फोहोर उत्पादन यायेत इनाप यानादीगु दु । वय्कलं छेँ, पसः, उद्योगपाखें उत्पादन जुइगु फोहोर मध्ये ध्वगीगु फोहोरयात छेँय् हे व्यवस्थापन यायेत व ध्वमगीगु फोहोर जक गाडी वइबलय् वायेत नं इनाप यानादीगु दु ।
येँ मनपा नापं स्वनिगःया १८ गू नगरया फोहोर वंगु १३ दँ न्ह्यवंनिसें नुवाकोटया सिसडोलस्थित ल्यान्डफिल साइटय् वांछ्वयेगु ज्या जुया वयाच्वंगु दु । अन शुरुइ निदँया लागिं धकाः फोहोर वाःगु खः ।
आः फोहोर वायेगु ज्याया लागिं दीर्घकालीन ल्यान्डफिल साइट दयेकेत सिसडोलं २ किलोमिटर तापाक च्वंगु बञ्चरेडाँडाय् १७०० रोपनी जग्गाय् ज्या न्ह्याकाच्वंगु दु ।
LEAVE YOUR COMMENTS