अस्ट्रेलियाया समुद्री किनाराय् रहस्यमयी ‘डोम’

एजेन्सी- अस्ट्रेलियाया ग्रिन हेड बिचय् छगू रहस्यमयी धातुया डोम (गुम्बज) लुइकूगु दु । पर्थ शहरं २५० किमि तापाक लाःगु ग्रिन हेड बीचय् खनेदुगु थ्व डोम खनाः स्थानीयतलिसे प्रहरी नं अजूचायाच्वंगु दु । स्थानीयतय्सं थ्व डोम दकलय् न्हापां खंकूगु खः । अस्ट्रेलियाया अधिकारीतय्सं थ्व डोम छुं नं जहाजपाखें कुतुं वःगु मखयेफु धयाच्वंगु दु । प्रहरीं थ्व डोम खतरनाक जुइफु धासें स्थानीयतय्त डोमपाखें तापाक च्वनेत इनाप याःगु दु ।

स्थानीय प्रहरीं छगू वक्तव्य जारी यासें थःपिंसं राज्यया थीथी अधिकारीतलिसे थ्व डोम छु खः धयागु सीकेगु निंतिं सहकार्य यानाच्वनागु खँ धाःगु दु ।

स्थानीय छम्हेसिनं धाःकथं थ्व डोम २.५ मिटर ब्या व ३ मिटर ताहाकः दु । एबीसी समाचार संस्थाया कथं स्थानीयतय्सं शनिवाः बहनी थ्व डोम दकलय् न्हापां खंकूगु खः ।

उड्डयन विज्ञ जियाफ्रे थोमसं थ्व छुं रकेटया फ्यलु ट्यांक जुइमाःगु अनुमान यासें छुं मखुसां दछि न्ह्यः हिन्द महासागरय् वांछ्वयातःगु जुइमाः धाःगु दु । अस्ट्रेलियाया अन्तरिक्ष केन्द्रं नं छुं विदेशी अन्तरिक्ष यानपाखें कुतुं वःगु जुइमाः धाःगु दु । गुलिसिनं धाःसा सन् २०१४ य् पश्चिमी अस्ट्रेलियन कोस्टय् तंगु २३९ म्ह यात्रु दुगु विमान एमएच ३७० या भग्नावशेष जुइफु धाःगु दु ।

तर उड्डयन विज्ञ थोमसं धाःसा थ्व सम्भव मदु धाःदु । ‘थ्व बोइङ ७७७ य् दइगु छुं नं कथंया पार्टपूर्जा मखु । अले थ्व विमान तंगु गुदं मल्याये धुंकल, उकीया पार्टपूर्जा जूसा थ्व यक्व हे स्यनेधुंकूगु, प्वाःप्वाः खनेदयेधुंकूगु जुइ’ थोमसं धाःगु दु ।