क्यानाडाय एडमन्टन शहरय् मंकाः म्हपुजा
येँ (नेपालभाषा टाइम्स)- क्यानाडाया एडमन्टन शहरय् च्वंपिं नेवाःतय्सं छवाः न्ह्यः शनिवाः मंकाः म्हपुजा व नेपाल संवत् न्हूदँ ११४५ विशेष सांस्कृतिक ज्याझ्वः यानाः तःजिक हन । ज्याझ्वः नेवाः कल्चरल सोसाइट अफ अलब्रटाया ग्वसालय् एडमन्टन शहरया डगन कम्युनिटी हलय् जूगु खः । सन् २०१३ नीस्वसांनिसें थ्व संस्थां मंकाः म्हपुजा व नेपाल संवत्या न्हूदँ हना वयाच्वंगु दु ।
संस्थाया नायः डा. हेमन्त जोशी व न्वकु त्रिप्रसाद धौभडलें त्वाःदेवाय् मत च्याकाः मंकाः कथं उलेज्या यानादीगु ज्याझ्वलय् नेपाल संवत्या प्रवर्तक शंखधर साख्वाःया किपाय् स्वांमाः नं क्वखायेकूगु खः ।
ज्याझ्वलय् नायः जोशीं ब्वति काःवःपिं सकसितं न्हूदँया भिंतुना देछासें लसकुस यानादिल । थ्व झ्वलय् वय्कलं संस्थाया मू उद्देश्य नेवाः भाय्, साहित्य, संस्कृति, कलायात एडमन्टन क्यानाडय् सदां म्वाकायतयेगु खः धयादिल । म्हपुजाया बारे थःगु नुगः खँ तयादिसें वय्कलं प्राचीनकालं निसें न्ह्यानाच्वंगु म्हपुजा नेवाःतय् बिस्कं उत्कृष्ट सांस्कृतिक चलन जूगु खँ कुलादिल । म्हपुजाबलय् मुक्कं चित्त शुद्ध यानाः स्वस्थ व समृद्धिया मनोकामना यानाः थःत थःम्हं मन्दः दयेकाः पुजा यायेगु जूगुलिं थ्व म्हपुजाया चलन विश्वय् च्वंपिं सकल गैरनेवाःतय्सं नं नालाकायेबह जू धयादिल ।
अथेहे नेपाल संवत्यात बारे कनादिसें वय्कलं विश्वय् देय्यागु नामं स्थापना यानातःगु छगू जक संवत् नेपाल संवत् जूगु खँ कना । ११४४ दँ न्ह्यः नेपाल मण्डलय् शंखधर साख्वाः याम्ह बञ्जानं गरिबतय्सं त्यासा पुलाः भिंगु ज्या याःगु खँ कनादिसें वय्कलं शंखधरया भिंगु ज्याया कदर यानाः उबलय्या जुजु राघवदेवं म्हपुजाया शुभ दिन निसें न्हूगु संवत् नेपाल संवत् न्ह्याकादीगु खः धयादिल ।
लसकुस लिपा मन्दः पुजा यासें मंकाः म्हपुजा न्ह्याकूगु खः । मंकाः म्हपुजाय् १३० म्हेसिनं ब्वति काःगु खः । थकालि नकिंपिंसं सकसितं क्वखा, स्वांमाः सिसाबुसा, मरि, मसला, ख्वःसिं, स्यांगुलिं जाःग किस्ति लःल्हानाः खेलुइताः च्याकाः ख्येँ सगं देछाःगु खः ।
म्हपुजा धुंकाः सकसित नेवाः भ्वय् नकूगु खः । भ्वय् लिपा सांगीतिक ज्याझ्वः यासें न्हूदँ हंगु खः । ज्याझ्वलय् स्थानीय कलाकारपिं प्रविण श्रेष्ठ, रुपा न्याछ्याें, उषा महर्जन, नविन रंजित, सुरेश प्रधान, दिपेश श्रेष्ठपिंसं नेवाः म्ये, हुला प्याखं, सारंगीया धून न्ह्यब्वःगु खः । सांगीतिक ज्याझ्वःया दथुइ म्हपुजा व नेपाल संवत् सम्बन्धी न्ह्यसः लिसः कासा यासें नेवाः सांस्कृतिक जागरणया कुतः नं जूगु खः ।
म्हपुजा व न्हूदँया सांस्कृतिक ज्याझ्वः अनिशा प्रधान जोशीं संचालन यानादीगु खःया ज्याझ्वःया अन्तय् वय्कलं म्हपुजा व न्हूदँ हनेत ग्वाहालि यानादीपिं सकलें लिसें अलब्रटा सरकारयात संस्थापाखें सुभाय् देछायादीगु खः ।
LEAVE YOUR COMMENTS