मोदीया निगूगु भिडियो सन्देश

दिल्ली – भारतीय प्रधानमन्त्री नरेन्द्र मोदीं चिकित्सा शिक्षाया राष्ट्रिय प्रवेश परीक्षा (एनइइटी)या न्ह्यसः पौ परीक्षा स्वयां न्ह्यः हे पिहां वःगु घटनायात कयाः निक्वःखुसी इन्स्टाग्रामय् भिडियो सन्देश सार्वजनिक याःगु दु । भारतीय प्रधानमन्त्री मोदीं विहीवाः बहनि इन्स्टाग्रामय् भिडियो सन्देश पोस्ट यासें लोक परीक्षा संशोधन विधेयक पारित जूगु जानकारी बिउगु खः ।

भिडियो सन्देशय् मोदीं कडा प्रावधानत दुगु विधेयकं परीक्षा संचालन प्रणालीयात अझ सशक्त याइगु व न्ह्यसः पौ चुहावट जुइगु रोके जुइगु नं दावी याःगु दु । भिडियोलय् मोदीं धाःगु दु, ‘पेपर लिकया कारणं मस्तय् भविष्य संकटय् लानाच्वंगु दु । दक्वं राज्य व केन्द्रय् नं शिक्षा पद्धतिइ सुधारया अनिवार्य जूगु दु । प्रविधिया प्रयोग आवश्यक जू ।’

‘ब्वँमि मस्तय् भविष्यलिसे खेलवाड याइगु पेपर माफिया व ग्याङयात त्वःतेगु जुइ मखु, थ्व मामिलाय् कडा कानुनया नं आवश्यक जू । जिमिसं संसदय् विधेयक ज्वनाः वनागु खः, जिमिसं बियागु बचंकथं हे निन्हुतक निगुलिं सदनय् थ्व बारे विस्तृत रुपं सहलह जूगु दु’, मोदीं भिडियो सन्देशय् धयातःगु दु ।