पोल्याण्ड, स्लोभेनिया व चेक गणतन्त्रया प्रधानमन्त्रीं युक्रेनी राष्ट्रपति नापलात

एजेन्सी-युक्रेनय् जुयाच्वंगु युद्धया दथुइ मंगलवाः सनिलय् पोल्याण्ड, स्लोभेनिया व चेक गणतन्त्रया प्रधानमन्त्रीत युक्रेनया राष्ट्रपति नापलायेत रेलया खतरनाक यात्रा यानाः किएभ थ्यंगु दु । चेक गणतन्त्रया प्रधानमन्त्री पेत्र फियालां जेलेन्स्कीयात नापलायेधुंकाः सामाजिक सञ्जाल मार्फत राष्ट्रपति जेलेन्स्कीं साहसी लडाइ याःगु धासें प्रशंसा याःगु दु ।

फियालां थःपिं जेलेन्स्की नाप दुगु नं धाःगु खः । चेक गणतन्त्रया प्रधानमन्त्री पेत्र फियाला, पोल्याण्डया प्रधानमन्त्री मातेउस मोराभिएत्सकी व स्लोभेनियाया प्रधानमन्त्री यानेस यान्सा रुसं युक्रेनय् आक्रमण यायेधुंकाः युक्रेनया राष्ट्रपति भोलोदिमिर जेलेन्स्कीयात प्रत्यक्ष नापलाःपि नेता जूगु दु ।

युक्रेन व रुस दुथइ युद्ध जुयाच्वंगु २१ न्हु थ्यनेधुंकूगु दु । थ्वया दथुइ थ्यंमथ्यं ३० लाख युक्रेनीत थःगु देय् त्वःताः जःलाखःला देशय् शरणार्थी जूवनेत बाध्य जूगु दु । युक्रेनं दकलय् अप्वः शरणार्थी पोल्याण्डय् थ्यंगु दु । पोल्याण्डय् १८ लाख शरणार्थी थ्यंगु दु । अथेहे रोमानिया, मोल्डोभा, हंगेरी व स्लोभाकियाय् नं लखंलख शरणार्थी वनाच्वंगु दु । अथे हे रुस व बेलारुसय् नं शरणार्थीत थ्यंगु संयुक्त राष्ट्र संघं जानकारी बिउगु दु ।

युनिसेफया प्रवक्ता जेम्स एल्डरं बिउगु जानकारीकथं युक्रेन त्वःता वंपिं बछिं मल्याक शरणार्थी मस्त खः । युद्ध शुरु जुसां निसें आतकया दुने छगू मिनेटय् ५५ म्ह मस्त शरणार्थी जुयाच्वंगु दु । अथे धयागु प्रति सेकेन्ड छम्ह मचा शरणार्थी जुयाच्वंगु दु । शरणार्थी जूवनेमाःपिं मस्तय्त कठिन यात्रा यायेत थाकुयाच्वंगु दुसा मस्तय् अभिभावकतय्त थः मस्तय्त छु धयाः ह्ययेकेगु धयागु नं चिन्ता अप्वयाच्वंगु दु ।

सम्बन्धित बुखँ

LEAVE YOUR COMMENTS