मलेसियाया जुजुं नं राजगद्दी त्वःतल

मलेसियाया जुजु सुल्तान मोहम्मद न्याम्हम्ह थम्हं राजगद्दी परित्याग यायेगु घोषणा याःगु दु । मलेसियाया सुं नं जुजुं थथे राजगद्दी त्वःतेत्यंगु थ्व हे न्हापांखुसी खः । खुइदँ न्ह्यव बेलायती उपनिवेशं स्वतन्त्र जूगु मलेसियाय् आःतक सुनां नं थथे राजगद्दी त्वःतूगु मदुनि ।
मलेसियाया राजदरवारं जुजु मोहम्मदं छाय् राजगद्दी त्वःतेत्यन धयागु बारे धाःसा स्पष्ट रुपं धाःगु मदुनि ।

जुजु मोहम्मद न्याम्हम्हं छम्ह रुसी मिसालिसे ब्याहा यानातःगु दु धकाः वयागु निजी जीवनबारे हल्ला पिहां वःगुलिं राजीनामा बीत्यंगु खँ वयाच्वंगु दु । वंगु नोवेम्भरय् जुजु वासः यायेगु व बिदा माने यायेत पिहां वंगु खः । थ्वयां लछि लिपा मस्कोय् पुलांम्ह मिस मस्कोलिसे ब्याहा यानाच्वंगु तस्बिर सार्वजनिक जूगु खः ।

थ्व हल्ला व जुजु स्वास्थ्य स्थिति बारे नं दरवारपाखें छुं नं प्रतिक्रिया बिउगु मदुनि ।राजदरवारं पितबिउगु छगू वक्तव्यय् जुजु सुल्तान मोहम्मद न्याम्हम्हं मलेसियाया जनतायात न्ह्याबलें एकताय् तयातयेत, थःथवय् सद्भाव कायम यायेत व मिले जुयाः ज्या यायेत धाःगु दु धकाः जक न्ह्यथनातःगु दु ।

मोहम्मद न्याम्हम्हं सन् २०१६ या डिसेम्बरय् राजगद्दी लःल्हानाकाःगु खः । उबलय् वय्कः ४७ दँ दुम्ह खः । आः न्हूम्ह जुजु मल्यःतले मोहम्मद न्याम्हम्हं हे कार्यकारी भूमिका म्हिताच्वनीगु खँ नं धाःगु दु ।