भारतय् च्याम्ह सांसद निलम्बन

एजेन्सी – भारतय् राज्यसभाया च्याम्ह सांसदयात निलम्बन याःगु दु। इपिं सांसदतय्सं अनुशासनहीन ज्या याःगु द्वपनय् निलम्बन याःगु खः । राज्यसभाया अध्यक्ष एम बैंकेया नायडु समक्ष सोमवाः अनुशासनहीन ज्या याःगु द्वपं लाःपिं च्याम्ह सांसद विरुद्ध प्रस्ताव तःगु खः । थ्व स्वयां न्ह्यः वंगु आइतवाः च्वंगु राज्यसभाया बैठकय् गाक्कं वादविवाद जूगु खः । आइतवाःया बैठकय् कृषि सम्बन्धी छगू विधेयक पेश यायेगु झ्वलय् सदनय् वादविवाद जूगु खः ।

विपक्षी सांसदतय्सं उगु विधेयकयाअत कयाः विरोध यासें सदनया रोष्ट्रमया न्ह्यःने तक थ्यंकः वःगु खः । विपक्षी सांसदतय् व्यापक विरोधया बावजुद नं ध्वनिमतं विधेयक धाःसा पारित याःगु खः। सकलें सांसदतय्त छवाःया निंतिं निलम्बन याःगु भारतीय संचारमाध्यमं न्ह्यथंगु दु । थ्व हे झ्वलय् आइतवाः जूगु घटना लिपा सोमवाःया बैठक शुरु जुइवं राज्यसभाया उपाध्यक्ष हरिवंश विरुद्ध विपक्षीतय्सं अविश्वासया प्रस्ताव नं दर्ता याःगु खः। तर उगु प्रस्तावयात अध्यक्ष नायडुं खारेज याना बिउगु खः ।