ने. सं. ११४६ दिल्लागा पञ्चमी -

क्युबाय् देय्‌न्यंक मतया आपूर्ति अवरुद्ध

हवाना – क्युबाय् हाकनं देय्‌न्यंकं मतया आपूर्ति अवरुद्ध जूगु दु । क्युबाया राष्ट्रिय विद्युतीय प्रणालीइ वःगु समस्यां यानाः आइतवाः देय्‌न्यंकं मतया आपूर्ति अवरुद्ध जूगु खः । देय्न्यंकं मतया आपूर्ति अवरुद्ध जुइवं राजधानी हवानालिसें देय्या अधिकांश थासय् मत मदयेकाः खिउँसे च्वंकाः च्वनेमाःगु खः ।

राज्यपाखें संचालन जुयाच्वंगु युनियन इलेक्ट्रिका (युएनईं) राष्ट्रिय विद्युत प्रणालीइ पूर्णरुपं विच्छेद जूगु जानकारी बिसें ग्रिड संचालनया निंतिं ज्या जुयाच्वंगु धाःगु दु ।

न्हियान्हिथं धइथें जुयाच्वंगु थुकथंया समस्यां यानाः राजधानीलिसे थीथी सहर प्रभावित जुयाच्वंगु दु । अस्पताल, स्कुल, उद्योग, संचार, यातायात, लःया आपूर्तिइ तकं समस्या जुयाच्वंगु दु । क्युबाया ऊर्जा मन्त्रालयं नं विद्युत ग्रिड हाकनं संचालनया निंतिं ज्या जुयाच्वंगु धाःगु दु ।

क्युबा सरकारं ऊर्जा संकटया मू कारण इन्धनया अभाव व विदेशी दबाब जूगु धयावयाच्वंगु दु । क्युबाय् इन्धन आपूर्ति यायेत नं तःधंगु संकट जुयाच्वंगु दु । वंगु मार्चय् अमेरिकां छगू लख टन कच्चा चिंक ज्वना वयाच्वंगु रुसी चिंकया ट्यांकरयात क्युबा वनेत अनुमति बिउगु खःसा उगु चिकंया भण्डार फुइधुंकूगु दु । मेखे हवाना व वासिङ्टन दथुया स्वापू नं बालानाच्वंगु मदु ।

थ्व स्वयां न्ह्यः वंगु जुलाइ महिनाय् नं क्युबाय् थथे हे मतया आपूर्ति बन्द जूगु खः । इन्धनया अभाव, जीर्ण विद्युतीय पूर्वाधार व उत्पादनया क्षमता नं कमजोर जूगुलिं वइगु दिनय् नं थज्याःगु समस्या वयेफुगु विश्लेषकतय्स धाःगु दु । देय्या विद्युत प्रणालीइ जूगु थ्व लिपांगु दकलय् तःधंगु अवरोध खः ।