ने. सं. ११४६ दिल्लागा पञ्चमी -

बायोग्यास प्लान्ट संचालन यायेत सम्झौता

येँ (नेपालभाषा टाइम्स) – टेकुस्थित ‘फोहोरपाखें ऊर्जा’ (बायोग्यास) प्लान्टयात हाकनं सञ्चालनय् हयेत येँ महानगरपालिका व वैकल्पिक ऊर्जा प्रवर्द्धन केन्द्र दथुइ औपचारिक समझदारी जूगु दु । सोमवाः कार्यवाहक मेयर डंगोलया कार्यकक्षय् येँ मनपाया प्रमुख प्रशासकीय अधिकृत सरोज गुरागाईं व केन्द्रया निर्देशक नवराज ढकालं समझदारी पतिइ हस्ताक्षर याःगु खः । येँ उत्पादन जुइगु ध्वग्गिगु फोहोर व्यवस्थापनयात आधुनिक, वैज्ञानिक व प्रविधिमैत्री दयेकेगु निंतिं थुगु पलाः छिउगु खँ धाःगु दु ।

सम्झौता लिपा थःगु धापू तसें कार्यवाहक मेयर डंगोलं परियोजनाया पुनर्स्थापना जक मखुसें उकियात निरन्तरता व दिगोपन मू हाथ्या जूगु खँ धासें धयादिल ।

‘शहरया जैविक फोहोरयात दिगो व्यवस्थापन यायेगु प्रविधि छ्यलेगु जिमिगु प्राथमिकता खः । थुगु प्लान्टयात हाकनं सञ्चालन यायेगु जक जिमिगु आज्जु मखु, थुकियात छगू सफल नमूनाया रुपय् स्थापित यानाः भविष्यया निंतिं सयेकेगु रुपय् विस्तार यायेगु तःधंगु उपलब्धी जुइ ।’

कार्यवाहक मेयर डंगोलं वंगु साउन १४ गते ऊर्जा, जलस्रोत तथा सिँचाइ मन्त्री विराजभक्त श्रेष्ठ लिसे नापलानाः अन्तर-सरकार समन्वय व वेस्ट टु इनर्जी परियोजनाय् सहकार्य यायेगु विषयसं सहलह यानादीगु खः । उगु उच्चस्तरयि परामर्शया लिच्वः कथं सम्झौता जूगु खँ धाःगु दु ।

सन् २०१७ निसें सञ्चालनय् वःगु प्लान्ट छुं ई न्ह्यवंनिसें प्राविधिक कारणं बन्द जूगु खः । युरोपियन युनियन व येँ मनपाया १ करोड ८२ लाख लगानीय दयेकूगु प्लान्टं न्हिं ३ मेट्रिक जैविक फोहोर प्रशोधन यानाः १४ किलोवाट मत व ३ सय किलोग्राम जैविक सा उत्पादन यायेगु लक्ष्य तयातःगु दु ।

समझदारी कथं वैकल्पिक ऊर्जा प्रवर्द्धन केन्द्रं प्लान्टया प्राविधिक अध्ययन, माःगु उपकरण न्यायेगु व जडान यायेधुंकाः येँ मनपायात हस्तान्तरण याइ ।