भारत-चीन सीमा विवाद : डिसइंगेजमेन्ट प्लानया बुँख गलत जूगु चिनिया अधिकारीतय् दावी

येँ – भारत व चीनया दथुइ जुयाच्वंगु सीमा विवादया सम्बन्धय् निगू देय्या उच्च सैनिक अधिकारीतय् दथुइ डिसइंगेजमेन्ट प्लानय् सहमति जूगु धाःगु खबर गलत जूगु दावी चिनिया अधिकारीतय्सं याःगु दु ।

बिहीवाः भारतीय पत्रिका ‘टाइम्स अफ इण्डिया’ य् निगूलिं पक्षया सेनां पूर्वी लडाखया फानकोङ छो-छुसुल धाःगु थासं थःपिनिगु सैनिक, ट्यांक लगायत युद्ध सम्बन्धी ल्वाभः व गाडीत चीकेगु सहमति जूगु धकाः समाचार पिहांवःगु खः । तर थुगु खबरयात पूर्ण रुपं सत्य मजूगु धासें चिनिया पत्रिका ‘ग्लोबल टाइम्सं’ समाचार बिउगु दु ।

‘ग्लोबल टाइम्स’ नापं खँल्हासें छम्ह उच्च चिनिया अधिकारीं निगू देय्या सैन्य क्रप्स कमाण्डरत दथुइ जुयाच्वंगु च्यागूगु चरणया वार्ता सकारात्मक रुपं न्ह्याः वनाच्वंगु खःसां भारतीय मिडियाय् वःगु खँ धाःसा पूर्णरुपं सत्म मजूगु दावी याःगु दु । वय्कलं धयादी, ‘भारतीय मिडियातय्सं आन्तरिक राष्ट्रवादयात प्रोत्साहित यायेगु निंतिं थःगु देय्या अडान कडा रुपं प्रस्तुत यायेगु याः । तर उकी गुलिं खँ सत्य खःसा गुलिं असत्य दु ।’

‘ग्लोबल टाइम्स’ या कथं वार्ताय् सैनिक पुचया डिसइंगेजमेन्ट फानकोङ छो तालया दक्षिण वा उतरीपाखें सुरु यायेगु व निगूलिं देय्या सेनायात गुकथं लितहायेगु व गुलि संख्याय् सैनिकत दु धाइगु बारे न्हापाया चरणय् वार्ता जूगु खः ।

छिङ्वा विश्वविद्यालयया राष्ट्रिय रणनीतिक सांस्थानया निर्देशक छियान फङ्गं भारतीय मिडियाय् वयाच्वंगु बुखँ आधिकारिक मखसें न्हापा जुयाच्वंगु वार्तापाखें वयेफुगु लिच्वःयात कयाः मिडियां थःगु धारणा प्वंकूगु धयादी । वय्कःया कथं भारतीय मिडियाय् वयाच्वंगु समाचारं भारतीय सेनाया बिचाःयात नं छुं हड तक न्ह्यब्वयाच्वंगु बिचाः तयादी । दिपावलीया ई जुयाच्वंगुलिं भारतीय पक्षयात छुं राहत बीत व चिनिया पक्षया दबाव बीत नं थज्याःगु बुखँ वयाच्वंगु शंका निर्देशक छियान फङ्गया दु ।

भारतीय व चिनिया पक्षं नोभेम्बर ६ तारिक कुन्हु निगू पक्ष दथुइ सैनिक व कुटनीतिक तवरं वार्ता न्ह्याकेगु सहमति जूगुलिं सिमा क्षेत्रय् शान्तिपूर्ण वातावरण दयेकेत मंकाः अपील जारी याःगु खः ।

 

सम्बन्धित बुखँ

LEAVE YOUR COMMENTS