माल्दिभ्सय् ‘इन्डिया आउट’ अभियान
एजेन्सी – माल्दिभ्सय् थौंकन्हय् ‘इन्डिया आउट’ क्याम्पेन न्ह्यानाच्वंगु दु। माल्दिभ्सया सभामुख व पुलांम्ह राष्ट्रपति मोहम्मद नाशीदं थ्व क्याम्पेनया माल्दिभ्सय् उपस्थित भारतीय सैनिकत लित छ्वयेगु निंतिं न्ह्यानाच्वंगु दु । इन्डिया आउट क्याम्पेन थ्व हप्ता झन तच्वया वःगु दु । थुकियान अनया मू विपक्षी पार्टीं हे तच्वयेका च्वंगु दु। माल्दिभ्सया मू विपक्षी पार्टीं भारतीय सैनिकतय् उपस्थिति माल्दिभ्सया स्वायत्तता व स्वतन्त्रता विरुद्ध जुयाच्वंगु खँ धाःगु दु ।
मेखे विदेशमन्त्री अब्दुल्लां धाःसा भारत व माल्दिभ्स दथुइ क्वातुया वनाच्वंगु स्वापू स्वये मफुपिंसं थज्याःगु आलोचना यानाच्वंगु खँ धयादीगु दु। थ्व अभियानया झ्वलय् याःगु शान्तिपूर्ण विरोध प्रदर्शन व मोटरसाइकल र्यालीं प्रहरीं व्यापक गिरफ्तारी याःगु द्वपं नं प्रतिपक्षी पार्टी प्रोगेसिभ पार्टी अफ माल्दिभ्स पिपल्स नेशनल कंग्रेसं याःगु दु ।
माल्दिभ्सयात भारतं हे उपहार स्वरुप बिउगु हेलिकप्टर ब्वयेकेत भारतीय सैनिक अधिकारीत च्वनाच्वंगु दु। अथेहे आः थनया ढालू द्विपया हनीमाधू धाःथाय् नं भारतीय सेना थ्यनीगु अनुमान यानाच्वंगु दु। तर माल्दिभ्सया डिफेन्स फोर्सया प्रमुख मेजर जनरलं अब्दुल्ला शमालं धाःसा माल्दिभ्सय् छुं नं विदेशी सुरक्षा बल मदुगु दावी यानादीगु दु ।
LEAVE YOUR COMMENTS