कोमाय् लानाच्वंम्ह मिसां मचा बुइकल

अमेरिकाया एरिजोना राज्यय् छम्ह कोमाय् लानाच्वंम्ह मिसा मचा बुइकूगु दु । अजू चायापुक जूगु थ्व घटनायात कयाः प्रहरीं कोमाय् लानाच्वंम्ह मिसायात यौन उत्पीडन जूगु बारे नं जाँच सुरु याःगु दु । पीडित मिसा फिनिक्स लिक्क च्वंगु हेसिंडा हेल्थकेयरया छगू क्लिनकय् भर्ना यानातःम्ह खः ।

हेसिंडा हेल्थकेयरं थ्व घटनायात कयाः पूवंक जानकारी बिउगु मदुनि । हेल्थकेयरं घटनायात कयाः अफसोस जक प्वंकूगु दु । अमेरिकी टेलिभिजन च्यान सिबीएसया कथं उम्ह मिसां बुइकूम्ह मचा स्वस्थ दु । लिसें सिबिएसया कथं मिसा प्वाथय् दु धयागु खँ क्लिनिकया स्टाफतय्सं न्हापा हे सि तकं मसिउ ।

प्रहरीं उम्ह मिसाया बारे जानकारी धाःसा पितबिउगु मदुनि । फिनिक्स प्रहरीया प्रवक्तां थ्व मामिलाय् जाँच सुरु जूगु खँ धाःगु दु । सिबिएस टेलिभिजनं धाःसकथं उम्ह मिसां वंगु २९ डिसेम्बरय् मचा बुइकूगु खः । उम्ह मिसा कोमाय् लानाच्वंगुलिं न्ह्यागु इलय् नं वयागु हेरचाह यायेमाः, अथे जूबलय् वयागु क्वथाय् यक्व मनूत वये वने जुयाच्वनीगु खँ क्लिनिकं धाःगु दु ।

थ्व घटना लिपा क्लिनिकं विरामी नापलाकेगु नियमय् हिउपाः हे हःगु दु । आवंलिं अन मिसाम्ह विरामी नापलायेत मिजंम्ह वल धाःसा मिसाम्ह कर्मचारी छम्ह नं नापं दयेमाःगु नियम हःगु दु ।