झिंस्वम्ह मनू स्याःम्ह धुँ स्यात

भारतीय बन अधिकारीत झिंस्वम्ह मनूतय्त स्यानाः नयेधुंकूम्ह छम्ह नरभक्षी धुँयात स्यायेत ताःलाःगु दु । खुदँ दुम्ह थ्व नरभक्षी मिसाम्ह धुँयात गोली कयेकाः स्याःगु खः । निदँ न्ह्यव मनू स्यानाः पश्चिमी राज्य महाराष्ट्रया जंगलय् बिसिउँ वंम्ह धुँयात म्हिगः तिनि स्यायेत ताःलाःगु खः । धुँयात स्यायेगु निंतिं बन अधिकारीतय्सं धुँ आकर्षित याइगु अत्तर जंगलय् ह्वःगु खः ।

जनावर अधिकारकर्मीतय्सं उम्ह धुँयात बचे यायेगु निंतिं अभियान हे न्ह्याकाच्वंगु खः । धुँ मस्यायेगु निंतिं अदालतय् रिट तकं लाःगु खःसा सर्वोच्च अदालतं वन अधिकारीतय्सं उम्ह धुँ स्याये हे माःगु अवस्था वल धाःसा हस्तक्षेप मयायेगु खँ धाःगु खः ।शुक्रवाः सनिलय् छगू गस्ती पुचलं बारोती गां लिक्क धुँ खंगु सुचंया आधारय् वन अधिकारीतय्सं धुँ माःवंगु खः ।

थ्व धुँयात मालेगु निंतिं मध्य भारतय् तःधंगु खोज अभियान हे न्ह्याकूगु खः । वन विभागया सछिम्हं मल्याक अधिकारी, सुरक्षाकर्मी, बेहास याइपिं विशेषज्ञं, निशानेबाज व पशु चिकित्सकत छम्ह धुँ मालेगु निंतिं लगे जुयाच्वंगु खः । धुँ मालेगु निंतिं भारत न्ह्याःगु थ्व आःतकया हे तःधंगु अभियान धाःगु दु ।