स्कुल–स्कुलय् प्रहरी

वंगु छुं दँ थुखे समाजय् यौन हिंसा, साइबर अपराध, लैंगिक हिंसा थेंज्याःगु आपराधिक गतिविधि अप्वया वनाच्वंगु दु । प्रहरीया हे तथ्यांक स्वयेगु खःसा वंगु आर्थिक दँ ०७४÷७५ य् जक १,४८० बलात्कारया घटना जूगु खनेदु । साइबर अपराध, जबरजस्ती करणी, लैंगिक हिंसा, बहुविवाह, सम्बन्ध विच्छेद व घरेलु हिंसाया घटना नं उतिकं मात्राय् जुइगु यानाच्वंगु प्रहरीया तथ्यांकय् न्ह्यथनातःगु दु ।

घटना न्यूनीकरणया निंतिं प्रहरी, स्थानीय संघसंस्था, अधिकारकःमिं सचेतनामूलक ज्याझ्वःत याना वयाच्वंगुलिं थज्याःगु अपराध नियन्त्रणय् छुं हदतक म्होति वःसां नं निर्मूल थ्यंक हे धाःसा जुइ फयाच्वंगु मदु । कमजोर आर्थिक अवस्था जूपिं, शिक्षां बञ्चित जूपिं व पारिवारिक दबावय् लाःपिं मस्त हे हिंसा व अपराधया शिकार जूवनाच्वंगु खनेदु ।

थःथिति व म्हसिउपिंपाखें हे हिंसा जुइगु कारणं थज्याःगु हिंसा न्यूनीकरणया निंतिं सक्वस्थित महानगरीय प्रहरी प्रभागं सक्वया ब्वनेकुथिइ लैंगिक हिंसा व अपराध नियन्त्रणया निंतिं सचेतना ज्याझ्वः संचालन याना वयाच्वंगु दु ।

मिसा व मिसामस्तय् निंतिं जक मखसे मिजं मचा, ल्याय्म्ह ज्याथजिथिपिंत नं कानुन ज्ञान व सचेतनाया आवश्यक जुइगुलिं अपराध व हिंसापाखें बचे जुइत व बचे यायेत स्कुल–स्कुलय् प्रहरी वनाः उकथंया कक्षा संचालन यानागु प्रहरी निरीक्षक लक्ष्मी खनालं कनादिल ।

न्हापा आधुनिकतालिसें दुहां वःगु थीथी प्रविधिं यौनजन्य अपराधया घटना व हिंसा अप्वयेकेगु ज्या जूगु खनेदुगुलिं उकियापाखें सचेत जुइत छु यायेगु व छु गज्याःगु गतिविधि यात धाःसा कानुनकथं दण्डित जुइमाली धइगु विषयय् विद्यार्थीतय्त सचेतना शिक्षा बीगु याना वयाच्वनागु वय्कलं धयादिल ।

सक्व, पटाप, चाँपकोबोट, नांगलेभारे, सलम्बटार लगायत क्षेत्रया गुंगू ब्वनेकुथिइ उगु कक्षा संचालन यानागु व मेमेगु नं आपालं ब्वनेकुथिइ नं कक्षा संचालन यायेगु लक्ष्य दुगु वय्कलं जानकारी बियादिल । थज्याःगु कक्षा संचालन जुइधुंकाः मस्तय्सं थःपिंसं सयेका सीका काःगु खँ थः पासाभाइ व छेँजःयात नं कनीगु जूगुलिं हिंसा न्यूनीकरणय् ग्वाहालि जूवनीगु नापं सभ्य व हिंसारहित समाज निर्माणय् ग्वाहालि जुइगु बौद्धस्थित महानगरीय प्रहरी वृत्तया प्रहरी नायब उपरीक्षक नरेन्द्र चन्दं कनादिल ।

प्रायः माध्यमिक तहय् अध्ययन यानाच्वंपिं विद्यार्थीत म्हो उमेरय् हे लागू वासःया दुव्र्यसनय् फसे जुइगु यानाच्वंगु प्रहरीया धापू दु । थज्याःगु क्रियाकलापय् संलग्न जूपिंत ज्वनेगु झ्वलय् १२ निसें २३ दँ तकया उमेर समूहया मस्तलिसें मनूत दुगुलिं नं ब्वनेकुथि केन्द्रीत सचेतना ज्याझ्वः संचालन यानागु वय्कलं धयादिल ।

प्रहरीं ब्वनेकुथिस्तरं हे याःगु थुकथंया जानकारीमूलक ज्याझ्वलं समाजय् अपराध व हिंसा नियन्त्रण जुयाः सभ्य व समृद्ध समाज निर्माण यायेत ग्वाहालि जुइगु सक्व नगरपालिकाया समाजसेवी पुरुषोत्तम चौलागाइँ कनादिल ।