छाँयादेवी न्ह्यःने हे कम्प्लेक्स विरुद्ध सभा

येँ – थँबहीया छायाँदेवी कम्प्लेक्स विरुद्धय् म्हिगः स्थानीय वासिन्दा लिसें सम्पदाप्रेमीतय्सं तःधंगु जुलुस पिकयाः छायाँदेवी कम्प्लेक्स न्ह्यःने प्रदर्शन याःगु दु । थनया वंगलं न्ह्याःगु उगु जुलुस थीथी नारा थ्वयेकाः थँबहीया छायाँदेवी सेन्टरय् थ्यंकाः कोणसभा याःगु खः ।

येँ, यल व ख्वपया सलंसः जनतां ब्वति काःगु उगु जुलुसं छायाँदेवी सेन्टर थुनेमाःगु, सम्पदाय् जुयाच्वंगु अतिक्रमण बन्द यायेमाःगु, सम्पदा म्हासे याये दइमखु धकाः नारा थ्वयेकूगु खः ।कोणसभाय् सम्पदा बचाउ अभियन्तातय्सं ऐतिहासिक पलेस्वां पुखू गुकथं भूमाफियां अतिक्रमण यात उकियात खारेज यायेमाःगु माग याःगु खः ।

सभाय् स्थानीय वासिन्दा लिसें पलेस्वां पुखू बचाउ अभियन्ता भागवत नरसिंह प्रधान, कानुनविज्ञ जुजुकाजी महर्जन, नेवाः राजनीतिक अभियानया रविन्द्र श्रेष्ठ, फास्ट ट्रायक जनसरोकार समितिया नेपाल डंगोलपिंसं न्ववानादीगु खः ।

विरोध ¥यालीइ असं कोथुननी बचाउ अभियान, सेभ नेपाः भ्याली, नेवाः ग्वाहालि पुचः, उपत्यकाव्यापी सडक विस्तार पीडित संघर्ष समितिया लिसें थीथी संघ संस्थां ब्वति काःगु खः ।

थँबहीया चकंद्यः लिसे स्वापू दुगु पलेस्वां पुखू अतिक्रमण यानाः कम्प्लेक्स दयेकूगु विरोधय् स्थानीय वासिन्दां सर्वोच्च अदालतय् मुद्दा तयातःगु दुसा उगु मुद्दा विचाराधीन अवस्थाय् लानाच्वंगु इलय् हे छायाँदेवी कम्प्लेक्स दयेकेगु सिधयेकूगु खः।

छायाँदेवी कम्प्लेक्स निर्माण लिपा उकियात तत्कालीन संस्कृति मन्त्री रविन्द्र अधिकारीं उलेज्या यायेमाःगु खःसां स्थानीय वासिन्दां विरोध यायेवं मन्त्रीया पलेसा तत्कालीन सांसद लिसें वर्तमान संस्कृति मन्त्री योगेश भट्टराईं उलेज्या यानादीगु खः ।

 

सम्बन्धित बुखँ

LEAVE YOUR COMMENTS