कोरोना संक्रमण : अमेरिकाय् अल्पसंख्यकत अप्व सीफु

येँ – कोरोना भाइरसं सुयातं भेदभाव याइमखु धायेगु या । तःमि, नांदाःम्ह वा शक्तिशाली मनूत तकं थ्व ल्वचं कयाच्वंगुलिं मनूतय् हैसियत स्वयाः जुइगु ल्वय् मखु धकाः कोरोना भाइरसयात धायेगु यानाच्वंगु खः । तर उलिं हे थुकीया पूवंक खँ धाइमखु । यदि छम्ह मनू गरिब वा अल्पसंख्यक समुदायया खःसा वयात भाइरसया जोखिम अप्व दुगु खँ छगू तथ्यांकं क्यंगु दु । उगु तथ्यांकया कथं भाइरसपाखें संक्रमित जक मखु उम्ह मनूया सीगु सम्भावना नं उलि हे अप्व दु ।

आः तकया तथ्यांक कथं कोरोनाया कारणं अश्वेत समुदायया अमेरिकीत दकलय् अप्व सीगु दु । अमेरिकाया लुजियाना छगू अज्याःगु राज्य खः गन कोरोनाया कारणं दकलय् अप्व सीपिं अश्वेत समुदायया दु । नकतिनि सार्वजनिक जूगु तथ्यांक कथं अन सीपिं ७० प्रतिशत मनूत अश्वेत समुदाययापिं खः । तर उगु राज्यय् अश्वेत समुदायया जनसंख्या जम्मा एक तिहाई जक दु ।

अमेरिकाय् जक मखु, अज्याःगु हे संकेत बेलायतय् नं खनेदु । अन नं कोरोनाया बिरामीत श्वेत समुदायापिं स्वयां अश्वेत व एशियाली देय्या मनूत अप्व दु ।

छाय् थथे जुयाच्वन ले? साधरणतया मनूतय् आर्थिक व सामाजिक अवस्था बांमलापिंत थ्व ल्वचं अप्व प्रभावित यानाच्वंगु दु । विज्ञतय् कथं अमेरिकाय् अश्वेत समुदायया सामाजिक व आर्थिक अवस्था बांलामजूगु व गुणात्मक रुपं बांलागु स्वास्थ्य क्षेत्रय् उमिगु पहुँच मदु ।

अमेरिकाया एलर्जी व संक्रामक ल्वया राष्ट्रिय संस्थानया प्रमुख डा. एन्थोनी फाउसीं अल्पसंख्यतय्त अप्व ल्वचं कयाच्वंगु स्वीकार यानादी । वय्कलं धयादी, ‘झीसं स्यू की अल्पसंख्यकत उकी नं अफ्रिकन-अमेरिकनतय् दथुइ मधुमेह, उच्च रक्तचाप, दमया ल्वय् तसकं अप्व ।’

अमेरिकी राष्ट्रपति डोनाल्ड ट्रम्पं थ्व तसकं तःधंगु हाथ्या खः तर अफ्रिकन-अमेरिकनतय्त सरकारं फक्व ग्वाहालि याइगु बचं बियादीगु दु ।

उखे अश्वेत समुदाययापिंसं थःपिं समर्थन जक मालाच्वंगु मखसें ज्या जुइमाः धइगु पक्षय् दुगु धयाच्वंगु दु । छम्ह अश्वेत अमेरिकीं धयादी, ‘आः गुलि नं मनूत सीत उमित सम्मान यायेगु खःसा आः मेगू महामारीया निंतिं आवंनिसें हे तयारी यायेगु खः ।’

थ्व अवस्था धाइगु कोरोना भाइरसं झीगु निंतिं हःगु छगू तसकं गम्भीर न्ह्यसः ख: । सायद कोरोना भाइरसं स्यनाच्वंगु थीथी पाठ मध्ये थ्व नं छगू जुइ ।

(स्राेत : अलजजिराया निंतिं एल्क्सीया ओ ब्रायनया रिपोट)