
येँ (नेपालभाषा टाइम्स)-अख्तियार दुरुपयोग अनुसन्धान आयोगं पशुपति देगलय् जलहरी तयेगु झ्वलय् जूगु लुँ हिनामिनाया द्वपनय् पशुपति क्षेत्र विकास कोषया तत्कालीन सदस्य सचिव डा. प्रदिपकुमार ढकाल व तत्कालीन कोषाध्यक्ष मिलनकुमार थापा विरुद्ध भ्रष्टाचारया मुद्दा दर्ता याःगु दु ।
आयोगं जहरी तयेगु झ्वलय् उमिसं १ किलो ४८१.७८१ ग्राम लुँ हिनामिना याःगु धासें उकिया बापत १ करोड १७ लाख १ हजार ७८१ तका भ्रष्टाचार याःगु द्वपं बिउगु खः । कोषया वर्तमान कोषाध्यक्ष थापा तत्कालीन सदस्य सचिव नं खः । अख्तियारं पशुपति क्षेत्र विकास कोषया तत्कालीन बिशेत नाइके अरुणकुमार श्रेष्ठ विरुद्ध नं विशेष अदालतय् भ्रष्टाचारया मुद्दा तःगु दु ।
तत्कालीन प्रधानमन्त्री केपी शर्मा ओलीं पशुपतिइ लुँया जलहरी तयेगु निर्णय यायेवं अर्थ मन्त्रालयं ३० करोड तका निकासा याःगु खःसा कोषं नेपाल राष्ट्र बैंकयाके १०२ किलो लुँ न्यानाकाःगु खः ।
तर जलहरी दयेकेगु झ्वलय् १०१ किलो ४८.५ ग्राम जक लुँ छ्यःगु लूगु खँ अख्तियारं धाःगु दु । मेगु लँुइ घोटाला जूगु धासें मुद्दा तःगु खः ।
LEAVE YOUR COMMENTS