ने. सं. ११४६ अनलाथ्व सप्तमी -

स्वनिगःलय् दुहांपिहां जुइगु फुक्क सवारी साधनया विवरण तइगु

येँ – सरकारं स्वनिगःलय् दुहांपिहां जुइगु फुक्क सवारी साधनया विवरण तयेगु निर्णय याःगु दु ।

थौं च्वंगु मन्त्रीपरिषद्या मुँज्यां स्वनिगः दुहांवइगु प्रत्येक सवारी साधनया विवरण तयेगु निर्णय याःगु खः । विशेष यानाः ढुवानीया गाडीया नम्बर, सवारी चालकया नां, नागरिकता नम्बर, जन्म मिति लगायतया विवरण तइगु जूगु दु । लिपा स्वनिगलं वहे गाडी पिहांवनीगु इलय् विवरण कथं सवारी चालक खः मखु जाँच याइगु खँ धाःगु दु । नापं अज्याःगु गाडीइ अनावश्यक मनूत हयेमबीगु व यदि मनूत ल्ह्ययाच्वंपिं दुसा कारवाही यायेगु जानकारी सरकारया प्रवक्ता डा. युवराज खतिवडां बियादिल ।

अथेहे एम्बुलेन्सयात नं बांलाक जाँच यायेगु निर्देशन नं सरकारं बिउगु दु । नापं अत्यावश्यक बाहेकया सवारी साधनयात पास वितरण मयायेत सम्बन्धीत निकायतय्त निर्देशन बीगु निर्णय नं मुँज्यां याःगु दु ।

छुं ई थुके स्वनिगः दुहांवइगु सवारी साधन अप्वयेवं सरकारया आलोचना जुयाच्वंगु खः ।