ज्या याइगु संकेत हे मवल

नेपाल कम्युनिष्ट पार्टीया दुइ तिहाइ दुगु सरकार बने जूगु नं दछि धइथें दइन । तर थ्व सरकारं आः तकनं जनचाहना कथंया ज्या याःगु धाःसा खने मदुनि धाःसां जिउ । सरकारं नागरिकतय्त राहत स्वयां नं आहत जक बियाच्वन धाःसां जिउ । थ्व सरकारपाखें नागरिकतय्सं तःधंगु हे अपेक्षा याःगु खः । छाय्धाःसां देशय् ताः ई लिपा स्थिर सरकार वःगु खः ।

अथेला झिलाया ई धइगु उलि ताहाकःगु ई ला मखु । अय्नं थांैकन्हय् सरकारया गतिविधि स्वयेबलय् नागरिकतय्त राहत बीगु व देय् व जनताया लागिं छुं याइ लाकि धकाः गुगु आशा जुयाच्वंगु खः व चाहिँ याइ थें जुयाच्वंगु मदु । नागरिकतय्सं जक मखु स्वयम् नेकपाया नेता, कार्यकर्तातय्सं तकं सरकारया गतिविधियात कयाः असन्तुष्टि क्यनाच्वंगु दु ।

स्थिति गन तक थ्यनेधुंकल धाःसां आः थ्व सरकारयात स्वयम् थः हे नेता कार्यकर्तातय्सं तकं बांलाक विश्वास मयाना हयेधुंकल । लिपांगु इलय् सरकारं यानाच्वंगु ज्या व थ्वयागु थीथी गतिविधि स्वयेबलय् थ्व सरकार वास्तवय् ‘काम कुरो एकातिर कुम्लो बाकी थिमितिर’ धकाः खय्तय्सं धाःथें जुयाच्वंगु दु ।

सरकार थौंकन्हय् देय् व जनताया लागिं ज्या यायेगु स्वयां नं भाषण यानाः प्रचारबाजी यायेगु ज्याय् अप्वः तक्यनाच्वंगु दु । थुकिं यानाः सरकार अनावश्यक विवादय् नं यक्व तक्यनाच्वंगु दु । नेकपाया अध्यक्ष लिसें प्रधानमन्त्री केपी ओलीया ल्हातय् एकमना सरकार दु । तर थ्व एकमना सरकारया शक्तियात वय्कलं नागरिकतय्त राहत बीगु पलेसा भाषण जक बियाः फुकेगु ज्याय् छ्यलाच्वंगु दु ।

अथे ला प्रधानमन्त्री ओलीया भाषण उलि ज्या लगे मजूगु मखु । आपालं उखान टुक्का जक तयाः विपक्षीतय्त व्यंग्य नकीगु न्यनेबलय् न्ह्यइपुसे च्वं । अथे जुयाः हे खइ, प्रधानमन्त्री ओलीयात मनूतय्सं हँसिलो–रसिलो–रमाइलो प्रधानमन्त्री धायेगु याः । प्रम ओलीयात महत्वाकांक्षी अले म्हगसय् जक चाःचाः हिलानीम्ह धकाः नं धायेगु याः ।

ओली नेतृत्वया दुइ तिहाइ दुगु बल्लाःगु स्यल्लाःगु व शक्तिशाली धाःगु सरकारया शक्ति प्रधानमन्त्रीं अझ नं क्यने फयाच्वंगु मदुनि । प्रम ओलीयात देय् व जनताया लागिं ज्या यायेत सुनां पनाच्वन ? सरकारं छाय् आः तक एकमना सरकारया शक्ति क्यने मफयाच्वन ?

छक्वः वय्कलं आः जनताया छेँय् छेँय् ग्याँसया पाइप थ्यंकेगु जुइ धकाः भाषण यानादिल । लिपा उकियात संशोधन यानाः ग्याँसया पाइप मखु, विजुलया तार भुतू भुतली थ्यंका बी धयादिल । वय्कलं सिउगु खः लाकि मखु, जनताया भुतुली विजुलीया तार ला थ्व स्वयां न्ह्यः हे थ्यनाच्वने धुंकूगु दु । थ्व वय्कलं थ्यंके हे म्वाः ।

देशय् पानी जहाज चले यायेगु, रेल चले यायेगु, देय्यात स्वर्ग दयेकेगु, गरिबी ज्यंकेगु, वृद्ध भत्ता बढे यायेगु, देय्यात तुइन मुक्त यायेगु, देशय् दुने हे रोजगारी सृजना यायेगु, पेट्रोल खाली पत्ता लगे यायेगु धाःगु अनेक खँ नं बांलाःगु जोक हे जुइ ख्वाः वयाच्वन । थ्व फुक्क खँ आः तक नारा व भाषणय् जक सीमित जुयाच्वन ।

जनतायात आः भाषण मख एक्सन मालाच्वंगु दु । भाषणं जक ज्या पूवनी मखु । एक्सन ला क्यने हे माःगु अवस्था दु । यदि एक्सनय् वने मखन धाःसा थ्व फुक्कं हात्ती आयो हात्ती फुसा धाः थें जक जुइ । ओली नेतृत्वया दुइ तिहाइ दुगु बल्लाःगु स्यल्लाःगु व शक्तिशाली धाःगु सरकारया शक्ति प्रधानमन्त्रीं अझ नं क्यने फयाच्वंगु मदुनि ।

प्रम ओलीयात देय् व जनताया लागिं ज्या यायेत सुनां पनाच्वन ? सरकारं छाय् आः तक एकमना सरकारया शक्ति क्यने मफयाच्वन ? देशय् न्हियान्हिथं चोरी, हत्या, बलात्कार, अपहरण थेंज्याःगु घटना अप्वयाच्वंगु दु । निर्मला पन्तया हत्यारा पत्ता लगे यायेगु, यातायात सिण्डिकेट, लँुकाण्ड, नेवानिया वाइड बडी काण्ड, एशिया प्यासिफिक सम्मेलन थेंज्याःगु विषयत थौंकन्हय् न्ह्यःने वयाच्वंगु दु गुकिं सरकारयात बदनाम यानाच्वंगु दु ।

न्हापा बचं बियावः थें जनचाहना कथं जनजीविकानाप स्वापू दुगु खँ, जनताया आवश्यकतायात सहज रुपं सुलभ यायेगु व जनताया अपेक्षा कथं ज्या याये फयाच्वंगु मदुनि । चुनावया इलय् जनतायात छु छु याना बी काःगु खः, अज्याःगु ज्या यायेगुपाखे सरकारया न ध्यान वनाच्वंगु दु, न इच्छा हे क्यनाच्वंगु दु ।

वास्तवय् धायेगुु हे खःसा नागरिकतय्सं उलि ततःधंगु इच्छा आकांक्षा वा चाहना नं व्यक्त यानाच्वंगु मदु । नागरिकया आकांक्षा धइगु जनजीविकानाप स्वापू दुगु दैनिक आवश्यकतायात प्राथमिकताय् तयाः सरकारं उकियात जक पूवंका बिउसां गाः । जनताया न्हियान्हिथंया जीवन जक सहज याना बिउसां गाः ।

तर सरकारं धाःसा थुलि चीधंगु अपेक्षा तकं पूवंके फयाच्वंगु मदु । अथे ला ओली नेतृत्वया सरकार न्यादँया लागिं वःगु सरकार खःसा थ्व सरकारं आःतक थःगु दछिया ई तकं पूवंकूगु मदुनि । उकिं सरकारयात घनघोर यायेगु ई मत्यःनि । तर अथे खःसां हुने बिरुवाको चिल्लो पात धाःथें सरकारं अज्याःगु चिल्लो पातया संकेत क्यनाच्वंगु मदु ।

सरकारं भ्रष्टाचार चीकेगु, महंगी नियन्त्रण यायेगु, अनियमितता पनेगु, यातायातया सिण्डिकेट चीकेगु, देशय् शान्ति सुरक्षा कायम यायेगु आदि अनेक ततःधंगु बचं जनतायात बियातःगु दु । थ्व फुक्कं खँ दछिया दुने पूवंके फइ मखु । थुकिया लागिं अझं ज्या याये मानि । तर थ्व ज्या यायेगु लागिं कुतः ला आवंनिसें हे याये माल ।

थ्व कुतः हे सरकारं आः तक न्ह्याकूगु मदुनि । व नं याये थ्व नं याये धकाः सरकारं भाषण धाःसा खुब बियाच्वंगु दु । तर याःगु ज्याय् नं विवादय् जक तक्यनाच्वंगु दु । स्थानीय सरकार, प्रदेश सरकार व केन्द्रीय सरकारया ज्या देय् व जनताया समस्यायात समाधान यानाः देय्यात समृद्ध याना यंकेगु खः । तर नारा बिउ थें समृद्धिया संकेत मवयाच्वन । आःया इलय् अज्याःगु संकेत जक वःसां धन्य धाये माली ।

सम्बन्धित बुखँ

LEAVE YOUR COMMENTS