नेतातय्के राजनीतिक नैतिकताया अभाव

गुगुं नं राजनीतिक दलयात स्वब्वय् निब्व (दुइ तिहाइ) बहुमत दयेवं दक देशय् राजनीतिक स्थिरता वइमखु धइगु मेगु छगू घटना नेपाःया वर्तमान राजनीतिं क्यनाबिउगु दु। गबलय् तक राजनीति याइपिं नेतातय्के राजनीतिक नैतिकता दइमखु अबलय् तक राजनीतिक स्थिरता दइमखु धइगु छगू दसु नेपाःया वर्तमान राजनीतिक स्थिति खः । आः गुगु राजनीतिक अवस्था ब्वलंगु दुअले आःया राजनीतिक घटनाक्रमं देय् व जनता स्वयां नं नेतातय्के थःगु अहमता हे दकलय् अप्वः महत्व दुगु धइगु नं स्पष्ट सीदत ।

वंगु चुनावया इलय् राजनीतिक स्थायीत्व व समृद्धिया नारा बियाः चुनावी मैदानय् कुहां वःगु तत्कालीन वाम गठबन्धनयात आपालं जनतां विश्वास यानाः स्वब्वय् निब्व मत बिउगु खः । थ्व इतिहासं बिउगु छगू सुवर्ण अवसर खः । तर नेकपां उकियात पचे यायेमफुत वा वर्तमान प्रधानमन्त्रीं  जनताया मतयात कदर यायेमफुत । केपी ओली प्रधानमन्त्री जुइधुंकाः देशय् झन जक बेथिति अप्वया वन । देशय् सुशासन हयेगु नामय् थः आसेपासेतय्त जक कःघायेगु झ्वलय् भ्रष्टाचारयात संस्थागत यायेगु जक मखु। पार्टीया नीति अःखः थीथीकथंया बेथितियात झन जक अप्वयेका यंकल, उकियात प्रश्रय बिया यंकल । गुकिया लिच्वःकथं सरकार व सरकारया नेतृत्व यानाच्वंगु पार्टीया दथुइ द्वन्द्व ब्वलन । थ्वहे द्वन्द्वया दथुइ प्रधानमन्त्री केपी ओली झन जक तानाशाही जुयाः न्ह्याः वनेगु लँपुइ वन गुकिया लिच्वः आः एकीकरण जूगु करिब निदँ निदँत्या दुने हे हाकनं पार्टी कुचा दलेगु क्रम शुरु जुल । थुकिया मुक्कं दोषी प्रधानमन्त्री केपी शर्मा ओली खः । राजनीतिइ दूरदर्शिता दयेमाः । तर प्रम केपी ओलीयाके उगु दूरदर्शिता मदु धइगु खँ आः स्पष्ट जूगु दु ।

वर्तमान सरकार गठन जूगु इलय् जनतां विश्वास याःगु खः कि आः देशय् राजनीतिक स्थिरता ब्वलनी । देशय् विकास जुइ । तर जनताया आशा हाकनं छक्वः निराशाय् हिला वन । देय् विकास जुइमाः थाय् नेतातय् जक विकास जुल । तर देय् झन्झन् अन्यौलय् लायेगु क्रम नं शुरु जुल । पार्टी व सरकारया दथुइ ब्वलंगु अहमतां अन्ततः प्रधानमन्त्री केपी ओलीं संसद हे विघटन यानाबिल, आः हाकनं मेगु चुनाव यायेकथं । तर प्रम ओलीं गुकथं संसद विघटन याःगु दु । उकिया लिच्वः आः केपी ओलीया राजनीतिक जीवन नं दाउलय् लाःगु दु। तर ओलीं उकियात वाःचायेकेगु कुतः धाःसा यानाच्वंगु खनेमदु ।

न्ह्यइपुगु खँ ला छु धाःसां नेपाःया आःया संविधानय् अज्याःगु प्रावधान तये मजिउ धकाः सल्लाह बिउपिं मेपिं सुं मखसे प्रधानमन्त्री केपी शर्मा ओली, वर्तमान राष्ट्रपति विद्यादेवी भण्डारी व पार्टीया उपाध्यक्ष जुयाच्वंम्ह अले तत्कालीन सभामुख सुभास नेम्वाङपिं खः ।

संविधानतः वर्तमान संसद भंग यायेगु अधिकार प्रधानमन्त्रीयात बियातःगु मदु। संविधानय् यानातःगु व्याख्याकथं गुगुं नं दलपाखें सरकार गठनया कुतः ताः मलात धाःसा जक संसद भंग यानाः मेगु निर्वाचन यायेफइगु व्यवस्था यानातःगु दु। तर प्रधानमन्त्री ओलीया थःगु स्वब्वय् निब्व बहुमत दुगु सरकारं संसद भंग यायेगु ज्या यात। गुकिं देशय् हाकनं छकः अस्थिरता ब्वलंका बिउगु दु। अथे खःसां नेकपां अझ नं संसद भंग मजूगु दावी यानाच्वंगु दुसा मेखे थीथी राजनीतिक पार्टीतय्सं नं संसद विघटन मजूगू खँ धायेगु यानाच्वंगु दु। उकथं हे संविधानविद् लिसें पुलांपिं प्रधानन्यायाधीशपिंसं तकं वर्तमान प्रधानमन्त्रीयात संसद भंग यायेगु अधिकार मदु धकाः न्ववायेगु क्रम शुरु जूगु दुसा मेखे प्रधानमन्त्री ल्ह्वंगु पलाःयात कयाः थीथीकथंया आन्दोलन नं तच्वया वनाच्वंगु दु ।

२०४७ सालया संविधानय् प्रधानमन्त्रीयात संसद विघटन यायेगु अधिकार बियातःगु खः । उगु संविधानय् बियातःगु अधिकार दुरुपयोग जुल धकाः २०६२/६३ या आन्दोलन लिपा दयेकूगु संविधानय् प्रधानमन्त्रीया उगु विशेषाधिकारयात क्वपाःगु खः । न्ह्यइपुगु खँ ला छु धाःसां नेपाःया आःया संविधानय् अज्याःगु प्रावधान तये मजिउ धकाः सल्लाह बिउपिं मेपिं सुं मखसे प्रधानमन्त्री केपी शर्मा ओली, वर्तमान राष्ट्रपति विद्यादेवी भण्डारी व पार्टीया उपाध्यक्ष जुयाच्वंम्ह अले तत्कालीन सभामुख सुभास नेम्वाङपिं खः । आः वयाः संविधानय् थःपिंसं हे संसद विघटन यायेगु व्यवस्था तयेमजिउ धकाः बिउगु सुझावयात उल्लंघन यायेगु धइगु राजनीतिक बेइमानी बाहेक मेता छुं मखु। अले उगु राजनीतिक बेइमानीयात लालमोहर तयेगुलिइ राष्ट्रपतिं म्हितूगु भूमिकां वय्कःया नं इतिहासय् कलंकित याइगु निश्चित दु ।

केपी ओली प्रधानमन्त्री जुइधुंकाः देशय् हिउपाः हयेगु निंतिं आपालं अवसर वःगु खः । तर प्रम ओली थःत वःगु अवसरयात उचित प्रयोग यायेगु स्वयां उकियात नजर अन्दाज यायेगु ज्या यात । गुकिं वय्कःया लोकप्रियता म्हो जुइगु क्रम शुरु जुल । वय्कलं ज्या यायेगु स्वयां नं उखान टुक्का धायेगुलिइ हे आपालं ई बिकल । येँय् रेल हयेगु निसें छेँय् छेँय् ग्यासया पाइप थ्यंकेगु, नेपाःया ध्वाँय् तयाः पानी जहाज चले यायेगु थेंज्याःगु फय्गं खं वय्कःया राजनीतिक उचाइयात म्हो यायेगु ज्या यात । खः छगू इलय् भारत विरोधी अभिव्यक्ति बियाः व चीनलिसेया स्वापू क्वातुकाः वय्कलं थःगु राजनीतिक उचाईयात थकाःगु खः । तर थम्हं थकाःगु उगु राजनीतिक उचाईयात वय्कलं कायम याना तयेमफुत । नेपाःया न्हूगु नक्सा प्रकाशन यायेगु झ्वलय् वय्कलं दक्व राजनीतिक पार्टीया विश्वास कयादिल । तर उगु नक्सा कार्यान्वयन यायेगु सम्बन्धय् धाःसा वय्कः लिचिलादिल । गुकिं यानाः वय्कःया राष्ट्रवाद गज्याःगु खः धइगु खँ जनतां सीकेत थाकु मजुल । वय्कःया नक्कली राष्ट्रवादयात आः वयाः जनतां पत्याः यायेगु त्वःताहल । देशय् थुलिमछिं घटनाक्रमत विकास जुइधुंकाः नं प्रम ओलीयाके धाःसा अझ नं थ्व अहमता दनि, कि थ्व देय्या थः हे सर्वेसर्वा खः । तर गुबलय् तकया दुने ओली थज्याःगु भ्रमं मुक्त जुइ । अबलय् तसकं लिबाय् धुंकी ।

संसद विघटन लिपा आः देय्या राजनीतिक कोर्स गुकथं न्ह्याःवनी धइगु खँय् आम जिज्ञासा ब्वलनाच्वंगु दु। प्रधानमन्त्री ओलीं याःगु संसद विघटनयात कयाः थीथीकथं आन्दोलन तच्वया वनाच्वंगु दुसा मेखे थ्व मुद्दा आः संवैधानिक मुद्दा जुयाः सर्वोच्च अदालत थ्यंगु दु। आःया राजनीतिक कोर्सया करेक्सन सर्वोच्चं याइगु आशा राजनीतिक पार्टी लिसे आम जनतां यानाच्वंगु दु । राजनीतिक कोर्स निगूकथं करेक्सन जुइ । छगू सर्वोच्च अदालतपाखें मेगु राजनीतिक आन्दोलनं । आः गुगु लँपुइ वनाः राजनीतिक कोर्स करेक्सन जुइ धइगु खँ स्पष्ट जुइत धाःसा छुं ई पीमालीगु निश्चित दु। जनताया चाहना देशय् छुं नं कथंया हिंसात्मक घटना मजूसे कोर्स करेक्सन जुइमाः धइगु खः ।

सम्बन्धित बुखँ

LEAVE YOUR COMMENTS