मलेसियाय् न्हि छम्हया ल्याखं ज्यामित सिनाच्वन

येँ – यक्व ध्यबा कमे यायेगु, परिवारयात सुखपूर्वक लहीगु म्हगस ज्वनाः मलेसिया वनीपिं नेपाली ज्यामित मध्ये न्हि छम्ह ज्यामि अकालं सिनाच्वंगु दु । आत्महत्या, सतक दुर्घटना, कारखानाय् जुइगु दुर्घटना, तच्वःगु ल्वय् आदि कारणं सिनाच्वंगु तथ्यांक दु । मलेसियाय् च्वंगु नेपाली राजदूतावासं बिउगु तथ्यांक कथं सन् २०१८ या सुरुं निसें आःतक ३२२ म्हेसिया ज्यान वनेधुंकूगु दु ।

थ्व ल्याः सन् २०७ य् ३६४ म्ह दुगु खः । कार्यवाहक राजदूत कुमारराज खरेलया कथं सन् २०१८ य् दकलय् अप्वः आत्महत्या यानाः ४३ म्ह, सतक दुर्घटनाय् लानाः २५ म्ह, तच्वःगु ल्वचं कयाः ३९ म्ह, औद्योगिक दुर्घटनाय् लानाः १७ म्हेसिया ज्यान वंगु दु । द्यनाच्वंगु इलय्, अप्वः अय्लाः त्वनाः, थःथवय् ल्वानाः नं सीपिं जक १९८ म्ह दु ।

सीपिं मध्ये छम्ह जक मिसा दुसा मेपिं फुक्कं मिजंत लानाच्वंगु खँ धाःगु दु । सन् २०१७ य् सीपिं मध्ये ६५ म्हेसिनं आत्महत्या याःगु खःसा तच्वःगु ल्वचं कयाः ६३ म्ह सीगु खः । अथेहे सतक दुर्घटनाय् २७ म्ह,औद्योगिक दुर्घटनाय् १४ म्ह सीगु खः । मेगु थीथी कारण सीपिनि ल्याः १९५ म्ह दु ।

सन् २०१८ या सुरुं निसें आःतक ३२२ म्हेसिया ज्यान वनेधुंकूगु दु । थ्व ल्याः सन्
२०१७ य् ३६४ म्ह दुगु खः ।

खरेलया कथं क्षयरोग, स्येँया ल्वय्, डेङ्गु, मस्तिष्कघात,एपेन्डिसाइटिस, मेनेन्जाइटिस थेंज्याःगु ल्वय्या कारणं सीपिनि ल्याः नं यक्व दु । रेलया ठक्करं सीपिं, बसं कुतुं वंपिं, करेन्टं ज्वनाः सीपिं नं यक्व दु । मलेसियाया लिपांगु तथ्यांक कथं स्वंगू लाख ८३ हजार नेपाःमि ज्यामित दु । भिसाया म्याद फुइधुंकाः सुलाः च्वनाच्वंपिं नं छगू लाखं मल्याक दुगु खँ खरेलं धयादीगु दु ।

लिपांगु इलय् श्रम सम्झौता कार्यान्वयन यायेमफुगुलिं मलेसियाय् ज्यामित धाःसा वने खनाच्वंगु मदुनि । उकिं मलेसियाय् थौंकन्हय् ज्यामितय् ल्याः म्हो जुयाच्वंगु दु । न्हापा थन न्हय्गू लाख धयाथें नेपाली ज्यामित थ्यनाच्वंगु खः ।

कार्यवाहक राजदूत खरेलं नेपाली ज्यामितय्क आवश्यक सीप, क्षमता व थनया वस्तुस्थिति बारे ज्ञान मदुगुलिं नं थीथी कारणं सिनाच्वंगु खँ धयादीगु दु । वय्कलं मलेसियाय् च्वनाच्वंपिं व वये चाहे जूपिं ज्यामितय्त थनया वस्तुस्थिति, कानुन, भाषा थेंज्याःगु विषयय् बांलाक ज्ञान कयाः जक वयेमाःगु सुझाव बियादीगु दु ।