महतोया सानिमाया शेयर संचय कोषं न्यात

येँ – गैरआवासीय नेपाली संघया संस्थापक अध्यक्ष व व्यवसायी उपेन्द्र महतों सानिमा बैंकय् च्वंगु थःगु सेयर मिउगु दु । महतों थः किजा डा. विरेन्द्रया नामय् सानिमा बैंकय् दुगु साढे ३ प्रतिशत शेयर कर्मचारी संचयकोषयात मिउगु खः ।कोषं न्याःगु संस्थापक शेयर स्वीकृतिया निंतिं आः राष्ट्र बैंकय् छ्वयेधुंकूगु खँ धाःगु दु ।

राष्ट्र बैंकं स्वीकृति बिइवं नामसारी जुइ, अले सानिमा बैंकया लगानीकर्ताय् संचयकोष दुहां वनीगु जुइ । महतों सानिमाया १०० तका अंकित २७ लाख १८ हजार ८३४ कित्ता संस्थापक शेयर प्रति कित्ता १८० तकां मिउगु खः । थ्व शेयर मियाः महतोया ल्हातय् ४८ करोड ९३ लाख ९० हजार ३०० तका लाःगु दु ।

महतों नख्खुइ चायेकूगु तःधंगु अस्पताल मेडिसिटीइ ध्यान बिइगु निंतिं मेमेगु व्यवसायपाखें ल्हाः लिकया हयाच्वंगु खँ धाःगु दु । अर्बौं लगानीइ चायेकूगु थ्व अस्पतालयात महतों अन्तर्राष्ट्रिय मापदण्डया दयेकाः विदेशीतय्त तकं उपचारया निंतिं नेपाः हयेगु कथं ज्या न्ह्याकाच्वंगु दु ।