कृषि बीमा प्रभावकारी मजुल

येँ – सरकारं प्यदँ न्ह्यव निसें सुरु याःगु कृषि बीमा योजना बारे किसानतय्सं बांलाक थुइकेमफुगुलिं यक्व नोक्सान फयेमालाच्वंगु दु । छुं न्हि न्ह्यव देन्यंकं वा व प्वं वयाः यक्व हे बाली स्यंकल । करोडौंया नोक्सान जुल, तर किसानतय्सं बालीया बीमा यानामतःगुलिं उकिया क्षतिपूर्ति तकं कायेफुत, थःपिं हे द्याका च्वनेमाल ।

कृषि मन्त्रालयया कथं प्यदँ न्ह्यव सुरु याःगु बीमा योजनाय् आःतक च्याद्वः जक किसान आवद्ध जूगु दु । सरकारं थुगुसी जक हे नं करिब न्हय्गू करोड दां कृषि बीमाय् खर्च यायेगु योजना दयेकातःगु दु ।बाली किलं नइगु निसें वा, फय्, प्वं यानाः बाली नष्ट जुइगु जोखिम म्हो यायेत किसानतय्सं बीमा यायेमाःगु खँ कृषि मन्त्रालयं धयाच्वंगु दु । अथेखःसां किसानतय्सं थःपिनिगु बाली व पशुया बीमा गुकथं जुइ धयागु सीकेमफुनि ।

यक्व हे खेती जुइगु चितवनया हे किसानत तकं कृषि बीमा बारे बेखबर दु । चितवनया किसानतय्सं धाःगु दु, ‘थन बाली यानाच्वंपिं किसानतय्के गन वनाः बीमा यायेगु, थुकिया निंतिं छु छु माः धयागु तकं मसिउ । अथे जूगुलिं सुनां नं बीमा याःगु मदु ।’ न्हापा सरकारं बीमा प्रिमियरया ५० प्रतिशत तक पुलेगु यानाच्वंगु खःसा आः थुकियात अप्वयेका ७५ प्रतिशत यायेधुंकूगु दु ।

कृषकतय्त बीमा प्रिमियमय् सहुलियत बीत जक सरकारं न्हय्गू करोड दां फ्यानातःगु दु । थौंकन्हय् बीमाय् आवद्ध जुयाच्वंपिं अप्वः थें किसानत नं व्यवसायिक किसान जुयाच्वंगु दु । मन्त्रालयया कथं आः आवद्ध जुयाच्वंपिं च्याद्व किसान मध्ये न्याद्वः व्यावसायिक किसान दुसा स्वद्वः चिधंगु लागाय् खेती याइपिं किसान दु । नगदे बाली व तरकारीइ स्वयां नं पशु बीमाय् अप्वः किसान आकर्षित जुयाच्वंगु खँ मन्त्रालयया अधिकारीतय्सं धाःगु दु ।