स्थानीय निकायं ध्यबा खर्च मयाः

येँ -छखे स्थानीय निकायतय्सं सरकारपाखें ध्यबा मवयाः माक्व विकासया ज्या याये मखनाच्वन धयाच्वंगु दुसा मेखे सरकारं धाःसा स्थानीय निकायया लागिं थःपिंसं छ्वयागु ध्यबा स्थानीय निकायतय्सं खर्च हे मयाःगु द्वपं बिया हःगु दु । थुगुसी तःदँ लिपा स्थानीय निकायया चुनाव जुयाः निर्वाचित जनप्रतिनिधि वःगु जुयाः सरकारं आन्तरिक ऋण उठे यानाः जूसां स्थानीय निकायतय्त ध्यबा छ्वयागु खँ धाःगु दु ।

सरकारं थुगुसी १४५ अर्ब तका तक आन्तरिक ऋण उठे याये फइगु व्यवस्था याःगु खःसा आः तकया दुने ११९ अर्बया आन्तरिक उठे दुकायेधुंकूगु दु । उकी मध्ये अप्वः ब्व स्थानीय निकायतय्त बिउगु खः ।

आः चैत १ गते लिपा मेगु ७५ अर्ब तका दां स्थानीय निकाययात बीगु तयारी यानाच्वंगु दु । तर स्थानीय निकायतय्सं छ्वया हःगु ध्यबा हे बांलाक खर्च याये मफुगु कारणं मेगु ध्यबा छ्वयेत नं समस्या जुयाच्वंगु खँ धाःगु दु ।

सरकारी सूत्रं धाः कथं आः तक स्थानीय निकायतय्सं थःत वःगु मुक्कं ध्यबा मध्ये १५ प्रतिशत स्वयां अप्वः खर्च याये मफुनि । थथे जूगुया कारण स्थानीय निकायतय्गु नगरसभाया बैठक च्वनेगु लिबाःगुलिं धया हःगु दु । नगरसभाया बैठक मच्वंकं बजेटया बारे ज्या याये मफइगु व बैठक हे मच्वंगुलिं खर्च यायेत समस्या जूगु खँ धाःगु दु ।

खतुं केन्द्रीय सरकारं नं आर्थिक वर्ष शुरु जूगु च्यालामछि दयेधुंकूसां कुल विकास बजेटया २८ प्रतिशत स्वयां अप्वः दां खर्च याये मफुनिगु ल्याःचाः नं पिहां वयाच्वंगु दु ।

अर्थतन्त्रय् लिच्वः लाइगु खतरा

छखे स्थानीय निकायतय्सं थःथाय् वःगु बजेट तकं बांलाक खर्च मयाःगु व मेखे सरकारं नं विकास बजेट बांलाक खर्च मयाःगु कारणं उकिया लिच्वः देय्या राष्ट्रिय अर्थतन्त्रय् हे लायेफुगु खँ धाःगु दु । न्हूगु व्यवस्था वयेधुंकाः विकास निर्माणया आपालं ध्यबा स्थानीय निकाय मार्फत खर्च जुइगु प्रणाली दयेकातःगु दु । यदि स्थानीय निकायं यक्व ध्यबा खर्च मयात धाःसा उकिं यानाः छखे विकासया ज्या प्रभावित जू वनीगु व मेखे बजारय् ध्यबाया अभाव जुयाः आर्थिक तरलीकरणया समस्या पिहां वइगु खँ अर्थििवद्तय्सं धयाहःगु दु । थुकिं यानाः बैंकिंग समस्या समेत तच्वः जुइफुगु खँ नं धाःगु दु ।