वइगु आर्थिक दँया बजेट १४ खर्ब ७४ अर्ब ६४ करोड
येँ – सरकारं आर्थिक दँ २०७७/७८या निंतिं बजेट सार्वजनिक याःगु दु । वइगु आर्थिक दँया निंतिं सरकारं १४ खर्ब ७४ अर्ब ६४ करोडया बजेट हःगु खः ।
बिहीवाः अर्थमन्त्री डा. युवराज खतिवडां संघीय संसदय् बजेटया घोषणा यानादीगु खः । वइगु दँया बजेट थुगु दँया स्वयां ५८ अर्ब म्हो खः । थुगु दँय् सरकारं १५ खर्ब ३२ अर्बया बजेट हःगु खः ।
वइगु दँया बजेट मध्ये ९ खर्ब ४८ अर्ब चालु खर्च, ३ खर्ब ५२ अर्ब पुँजीगत खर्च व वित्त व्यवस्थापनया निंतिं १ खर्ब ७२ अर्ब विनियोजन याःगु दु ।
स्रोत व्यवस्थापनपाखे ८ खर्ब ८९ अर्ब ६२ करोड राजश्वपाखें म्हयेगु, ६० अर्ब ५२ करोड वैदेशिक अनुदानपाखें व्यवस्थापन याइगु जूगु दु । अथेहे वैदेशिक ऋणपाखें २ खर्ब ९९ अर्ब ५५ करोड व आन्तरिक ऋणपाखें २ खर्ब २५ खर्ब मुंकीगु लक्ष्य सरकारं काःगु दु ।
प्राथमिकताय् स्वास्थ्य व शिक्षा क्षेत्र
बजेटय् स्वास्थ्य क्षेत्रय् विषेश ज्याझ्वः हयेगु योजना दयेकूगु दु । स्वास्थ्य व जनसंख्या मन्त्रालयया निंतिं ९० अर्ब ६९ करोडया बजेट विनियोजन याःगु दु । स्वास्थ्य क्षेत्रय् न्हापाया स्वयां २१ अर्ब ९१ करोडं बजेट अप्वयेकूगु खः । सरकारं कोरोना संक्रमिततय् वासः यायेगु निंतिं ६ अर्ब विनियोजन याःगु दुसा संक्रमितया वासः यायेगु निंतिं खटेजूपिं स्वास्थ्यकर्मीतय् निंतिं ५ लखया बीमा यायेगु व्यवस्था याःगु दु । सरकारं संक्रामक रागया उपचार नियन्त्रण व अनुसन्धानयात प्राथमिकता बिउगु दु ।
बजेटय् शिक्षा, विज्ञान व प्रविधिया निंतिं १ खर्ब ७१ अर्ब ७१ करोडया बजेट विनियोजन याःगु दु । थ्व न्हापाया स्वयां ८ अर्बं अप्व खः । वइगु दँय् १ हजार ८०० विद्यालय भवन व ३८ आंगिक क्याम्पस भवन, २ हजार ५ सय २० कोठा स्थापना याइगु योजना दु ।
सरकारं भौतिक पूर्वाधारपाखे १ खर्ब ३८ अर्ब ८० करोडया बजेट बिनियोजन याःगु दु । राजस्व स्रोत म्हो जूगुलिं भौतिक पूर्वाधारय् न्हापाया स्वयां २५ अर्ब म्हो बजेट बिनियोजन याःगु खः । पुनर्निर्माणपाखे धाःसा सरकारं बजेट कटौती याःगु दु । सरकारं न्हूगु आर्थिक दँया निंतिं ५५ अर्ब विनियोजन याःगु दु । न्हापा पुननिर्माणपाखे १२१ अर्ब फ्याःगु खः । थुगुसी न्हापाया स्वयां ६६ अर्बं म्हो बजेट विनियोजन जूगु खः ।
सरकारं सांसद विकास कोषयात धाःसा निरन्तरता बिउगु दु । तर न्हापाया स्वयां थुगुसी म्हो जक बजेटया व्यवस्था याःगु दु । न्हापा ९ अर्ब ९० करोड बजेट दुगु कोषय् थुगुसी ६ अर्ब ६० करोड जक विनियोजक याःगु दु ।
LEAVE YOUR COMMENTS