छन्हुं हे स्वंगू आयोजनाया पिपिए
येँ – नेपाल विद्युत प्राधिकरणं १४० मेगावाट क्षमताया स्वंगू जलविद्युत आयोजनापाखें मत न्यायेगु निंतिं पिपिए याःगु दु । प्राधिकरणं त्रिशुली, दूधखोला व मच्छेखोला आयोजनालिसे थ्व सम्झौता याःगु खः । ब्लु इनर्जीं दयेकाच्वंगु सुपर त्रिशुली पाखें ७० मेगावाट मत न्यायेगु सम्झौता जूगु खः ।
थ्व आयोजना १०० मेगावाटया जूसां तत्कालया निंतिं प्राधिकरणं ७० मेगावाट जक मत न्यायेत्यंगु खः । प्राधिकरण निर्देशक कुलमान घिसिङ व कम्पनीया कार्यकारि निर्देशक बरुण सराफ दथुइ पिपिए सम्झौता हस्ताक्षर जूगु खः । सम्झौता कथं प्राधिकरणं थ्व आयोजना पाखें मत न्यायेत चिकुलाय् प्रति युनिट च्यातका व ४० पैसा व बर्खाय् प्रतियुनिट प्यतका व ८० पैसा पुलीगु जूगु दु ।
थ्व आयोजनां याकनं वित्तीय व्यस्थापन यानाः निर्माणपाखे वनेगु खँ प्रबद्र्धक ब्लु इनर्जीं धाःगु दु । थ्व आयोजनां विद्युत गृहय् ३३.३३ मेगावाटया स्वंगू टर्बाइन तइ । अथेहे मनाङ आयोजना स्थल जुयाच्वंगु ६५ मेगावाट क्षमताया दूधखोला जलविद्युत आयोजना लिसे नं मत न्यायेगु सम्झौता याःगु दु ।
थ्व सम्झौताय् प्राधिकरणया निर्देशक घिसिङ व प्रबद्र्धन सिता हाइड्रो पावर कम्पनीया निर्देशक सतिस तिम्सिनां हस्ताक्षर याःगु खः । अथेहे प्राधिकरणं विकास हाइड्रो पावरं दयेकीगु ४.५५ मेगावाट क्षमताया मच्छेखोला जलविद्युत आयोजनालिसे नं मत न्यायेगु सम्झौता याःगु खः ।
ऊर्जा मेला जुइगु
नेपाःया ऊर्जा व जलविद्युत क्षेत्रय् वैदेशिक लगानी दुत हयेत व लगानीया थीथी ढाँचा बारे जानकारी बीगु ताःतयाः हिमालयन हाइड्रो एक्स्पो २०१९ ग्वसाः ग्वइगु जूगु दु । सोमवाः छगू पत्रकार सम्मेलन यासें बिउगु जानकारी कथं वइगु झिदँ दुने १५ हजार मेगावाट मत उत्पादन यायेगु लक्ष्य पूवंकेत निजी क्षेत्रं म्हितेमाःगु भूमिका बारे नं सहलह जुइगु खँ धाःगु दु । स्वतन्त्र ऊर्जा उत्पादकतय् संस्था इपानया ग्वसालय् थ्व मेला वइगु माघ ४ गते निसें ६ गते तक भृकुटीमण्डलय् जुइ ।
LEAVE YOUR COMMENTS