न्हापाया द्यापं पर्केत पेट्रोलियम पदार्थया भाः क्वकायेमफुगु दावी

येँ – नेपाल आयल निगमं मोहनि धुंकाः निसें अन्तर्राष्ट्रिय बजार पेट्रोलियम पदार्थया भाः थहां वंकथं समायोजन मजूगुलिं आः नं अन्तर्राष्ट्रिय बजारय् इन्धनया भाः कुहां वःसां उकथं भाः क्वकायेमफुगु खँ धाःगु दु । उबलय् पेट्रोलियम पदार्थया भाः समायोजना मयाःगुलिं न्हिं निगू करोड द्यापं फयेमाःगु खँ निगमं धाःगु दु ।

मोहनि न्ह्यवनिसें अन्तर्राष्ट्रिय बजाः कथं भाः समायोजन मयाःगुलिं थथे द्यापं फयेमाःगु खँ निगमं धाःगु खः । निगमया कथं दकलय् अप्वः एलपी ग्यासय् द्यापं फयेमाःगु खः । नखःचखःया इलय् सर्वसाधारणयात समस्या जुइ कथं पेट्रोलियम पदार्थया भाः समायोजन मयायेगु निंतिं संसदया उद्योग तथा वाणिज्य व श्रम तथा उपभोक्ता संसदीय समितिं निर्देशन बिउगुलिं निगमं भाः थकाये मफयाच्वंगु खः ।

निगमं असोज २ गते लिपा पेट्रोलियम पदार्थया भाः समायोजन मयाःनि । निगमया निमित्त कार्यकारी निर्देशक सुशिल भट्टराई नं वंगु नावेम्भर ३० तक न्हि निगू करोडं मल्याकया ल्याखं घाटा जुयाच्वंगु व वंगु निलाया दुने निगू अर्बं मल्याक घाटा जुइधुंकूगु खँ बिबिसीयात धाःगु दु । थ्व आर्थिक दँय् जक प्यंगू अर्ब घाटा जुइधुंकूगु खँ वय्कलं धयादीगु दु ।

आः अन्तर्राष्ट्रिय बजारय् भाः कुहां वंसां नेपालय् भाः क्वमकाःगु खँय् आलोचना जुइवं निगमं न्हापा जूगु द्यापंया खँ न्ह्यथँगु खः । उबलय् जूगु घाटा निगम दुने हे च्वंगु छगू कोषपाखें पूर्ति यायेगु खँ निमित्त कार्यकारी निर्देशक भट्टराईं धयादीगु दु । वय्कलं बिबिसीयात धयादीगु दु, ‘नखःचखःया इलय् अन्तर्राष्ट्रिय बजाः कथं इन्धनया भाः थमकयागु कारणं जूगु नोक्सान कोष दुने च्वंगु मूल्य स्थिरिकरण कोषपाखें व्यहोरे यायेगु सहमति जूगु दु ।

थ्व कोषय् छुं ध्यबा ल्यं दयाच्वंगु दु ।’चालु आर्थिक दँया प्यला दुने थ्यंमथ्यं ६० अर्ब तकाया पेट्रोलियम पदार्थया आयात जुयधुंकूगु दु । थगुने थ्व हे अवधिइ मुक्कं ४० अर्बया जक आयात जूगु खः ।पेट्रोलियम पदार्थया कारणं जक देशं खर्बौं तकाया व्यापार घाटा फयेमालाच्वंगु अवस्थाय् विज्ञतय्सं पेट्रोलियम पदार्थय् दुगु परनिर्भरता म्हो यायेमाःगु खँ धाःगु दु ।

अर्थशास्त्री केशव आचार्यं धयादीगु दु, ‘ततःधंगु सहरय् चले जुइगु सार्वजनिक यातायात जक विद्युतीय यातायातय् सरे यायेफत धाःसां नं यक्व हे पेट्रोलियम पदार्थया आयात नियन्त्रण यायेफइ ।

अथेहे यक्व ऊर्जा खपट याइगु उद्योगतय्त भचा अप्वः ध्यबा कयाः जूसां मत बीफत धाःसा म्वायेकं म्वायेकं डिजेल छ्यलाः मत च्याकेगु आवश्यक जुइमखु । थज्याःगु ज्या लिबाके मजिउ । नेपालय् लछिया दुने पेट्रोल ४ करोड लिटर व डिजल १३ करोड लिटर खपट जुइगु जुयाच्वंगु दु ।

सम्बन्धित बुखँ

LEAVE YOUR COMMENTS