गल्छी–त्रिशुलीइ नं मुआब्जा विवाद

नुवाकोट – राष्ट्रिय गौरवया आयोजना गल्छी त्रिशुली मैलुङ–स्याफ्रुबेंसी–रसुवागढी सतक दयेकेगु झ्वलय् नुवाकोट खण्डया पीपलटारनिसें ढुंगे तकया क्षेत्रय् मुआब्जा बीगु निंतिं सरोकारवालातय्सं सरकारयाके माग याःगु दु । पीपलटार निसें ढुंगे तकया प्रभावितयात मुआब्जा मबिइगु योजना दयेकाः सतक योजनां ज्या न्ह्याकेवं स्थानीयवासीतय्सं मुआब्जा दयेमाःगु माग यासें आन्दोलनया चेतावनी बिउगु खः ।

आन्दोलनया चेतावनी लिपा विदुर नगपालिकां शुक्रवाः सार्वजनिक सुनुवाइ यानाः सरोकारवालातय् धारणा काःगु खः । आयोजना अन्तगृत लाःगु पीपलटार निसें ढुंगे तकया बालाजु त्रिशुली सतकखण्डय् लाःगु व थ्व सतक सीमा २०३४ सालया राजपत्रय् हे न्ह्यथनातःगुलिं थ्व थाय्या ९ किलोमिटर सतकय् मुआब्जा बी मिले मजूगु खँ आयोजनां धायेवं स्थानीयवासीतय्सं मुआब्जायात कयाः चिउताः प्वंकूगु खः ।

ज्याझ्वलय् न्ववासें सांसद नारायणप्रसाद खतिवडां सरकारं राष्ट्रिय गौरवया आयोजना कथं ज्या न्ह्याकूगुलिं मुआब्जा वितरणय् समस्या मजुइगु खँ कनादिल । वय्कलं नागरिकया अधिकारया निंतिं चिचिधंगु कानुनी पंगःयात चिइकाः वनेमाः धयादिल ।

अथेहे प्रदेश सभाया दुजः केशव पाण्डें थःपिनगु माग स्पष्ट यानाः न्ह्याः वनेत प्रभावितयात सुझाव बिसें कानुनी रुपं खनेदुगु अस्पष्टतायात मदयेकेगु निंतिं सकारात्मक रुपं माग तयेत इनाप यानादिल । अथेहे प्रदेश सभा सदस्य हिरानाथ खतिवडां सडक आयोजना विस्तारया झ्वलय् बजार क्षेत्रया भौतिक संरचनाय् तःधंगु क्षति जुइगु व गुलिखेसिया छेँ बुँ हे वनीगु अवस्था दु धासें थुकिया समस्या समाधान यायेमाः धयादिल ।

मेखे आयोजनाया प्रमुख सुवोधकुमार देवकोटां पीपलटार ढुंग खण्डया मुआब्जा बिइगु वा मबिइगु धयागु बारे छुं निर्णय मजूनि धयादिल । वय्कलं कानुनी प्रक्रिया पूवंका न्हापाया सरकारया निर्णयया आधारय् निष्कर्षय् वनेगु खँ धासें आः हे मुआब्जा बीमखु धकाः कायेमछिं धयादिल ।

प्रमुख जिल्ला अधिकारी उद्धवबहादुर थापां सडक योजनां हे फुक्क ज्या न्ह्याकाः थःथाय् वइगु जूगुलिं योजनां हे थुकी छु गथे यायेगु याकनं क्वःछिइमाः धयादिल । सरोकार समितिया संयोजक लीलानाथ न्यापानें मुआब्जा बीगु राष्ट्रया हे नीति दुसां भ्रम न्यंकाः नागरिकतय्त अन्या यायेत स्वयाच्वंगु खँ धयादिल ।

थौंकन्हय् गल्छी–त्रिशुली–मैलुङया ४६ किमि सतक खण्ड स्तरोन्नतिया ज्या न्ह्यानाच्वंगु दु । थुकी आःतक २८ प्रतिशत ज्या क्वचायेधुंकूगु खँ योजनां धाःगु दु । थ्व खण्डया गल्छी देवीघाट खण्डया मुआब्जा बीगु सुरु जुइधुंकूगु दुसा गंगटे–ढुंगे खण्डय् प्यंगू लेन दयेकीगु जूगुलिं यदि थ्व सतकय् मुआब्जा मबिल धाःसा यक्वसिया उठीबास जुइगु खँ बट्टारया स्थानीय वासिन्दा संजीवबहादुर श्रेष्ठं धयादिल ।

 

सम्बन्धित बुखँ

LEAVE YOUR COMMENTS