मंसिर निसें माथिल्लो तामाकोशी संचालनय् वइगु

दोलखा – ऊर्जा, जलस्रोत तथा सिँचाइमन्त्री वर्षमान पुनं राष्ट्रिय गौरवया आयोजना जुयाच्वंगु ४५६ मेगावाट क्षमताया माथिल्लो तामाकोशी जलविद्युत आयोजना निरीक्षण यानादीगु दु । शनिवाः दोलखा थ्यंकंवंम्ह मन्त्री पुनं उगु आयोजनाया बाँधस्थल, सुरुङ्ग, माथिल्लो पेनस्टक, तल्लो पेनस्टक अवस्था बारे निर्माणस्थलय् हे वनाः जानकारी कयादीगु खः ।

आयोजनाया निरीक्षण लिपा सञ्चारकर्मीलिसे खँ ल्हासें राष्ट्रिय गौरवया थ्व आयोजना क्वःछिनातःगु इलय् हे क्वचाइगु खँ धयादीगुदु । वय्कःया कथं वइगु मंसिर दुने थ्व आयोजना पूर्वक संचालन वइ । ‘थ्व तसकं महत्वपूर्ण आयोजना जूगुलिं थुकी जिमिगु गम्भीर चासो दु । आयोजना इलय् क्वचायेकेत व गुणस्तरीय दयेकेत जिं पूवंक ध्यान केन्द्रित यानागु दु ।

जि क्वःछिनातःगु ई दुने हे आयोजना पूवनीगु खँय् विश्वस्त दु’ मन्त्री पुनं धयादिल । नेपाली श्रम, सीप व पुँजी परिचालन यानाः तःधंगु आयोजना पूवंकेफइमखु धयागु सोच न्हापा दुगु धासें थ्व आयोजनापाखें नेपाःमिपिंसं थःपिंसं हे तःधंगु आयोजना दयेकेफु धयागु पुष्टि यानाक्यंगु खँ नं कनादिल ।

मन्त्री पुनः तामाकोशी जलविद्युत आयोजना नेपाःया निंतिं नमूना व महत्वपूर्ण जूगु खँ नं कनादिल । वय्कलं धयादीगु दु, ‘छुं ई न्ह्यः भर्टिकल साफया कारणं छुं समस्या वःगु खः । जिमिसं टेक्सम्याक व एन्ड्रिजया दथुइ समझदारी दयेकाबियागु दु । आः ज्या न्ह्यानाच्वंगु दु । उकिं नं वइगु मंसिर दुने ज्या क्वचाइ ।’

थ्वयां न्ह्यव आयोजनाय् समस्या खनेदुगुलिं मन्त्री पुनं हे ऊर्जा मन्त्रालयया सचिव, प्राधिकरणया कार्यकारी निर्देशक, आयोजना प्रमुख व टेक्सम्याको निर्माण कम्पनीया प्रतिनिधि तयाः सहलह यानाः क्वःछिनातःगु इलय् हे आयोजना पूवंकेत निर्देशन बियादीगु खः । सहलहया इलय् आयोजनाया ज्या न्ह्याःमवन धाःसा ठेक्का तोडे यायेगु चेतावनी तकं बियादीगु खः ।

आयोजना निर्माणय् दुगु समस्या सरकारं इलय् हे समाधान यानाबीवं माथिल्लो तामाकोशी जलविद्युत आयोजनाया भौतिक प्रगति गुणात्मक रुपं परिवर्तन जूगु दु । आः थ्व आयोजनाया भौतिक प्रगति करिब ९८ प्रतिशत थ्यनेधुंकूगु दु ।