किपुलिइ अय्लाःथ्वँ महोत्सव जुइगु
किपू (नेपालभाषा टाइम्स)÷नेपाःया चा व लःफय् कथं सइगु थीथी अन्नं दयेकातःगु अय्लाः व थ्वँया नं विशेष महोत्सव याइगु जूगु दु । किपूया नेवाः लहना रेष्टुरेन्टय् थ्वहे वइगु फागुन २४ निसें २८ गते तक थ्व महोत्सव जुइत्यंगु खः ।
थ्व महोत्सवय् जाकि लिसें दुसि व छ्वया अय्लाः दइया झिताजिया थ्वँ नं दइगु खँ धाःगु दु । वकुन्हु थन मुति थ्वँ, बति थ्वँ, निगार थ्वँ, चाकःथ्वँ, भ्यावर थ्वँ, करःथ्वँ, ह्याउँथ्वँ, छ्वथ्वँ, दुसिथ्वँ व कःनिथ्वँया सवाः काये खनीगु खँ ग्वसाः खलकं धाःगु दु ।नेवाः नसात्वँसाया नसा नखः इलय् ब्यलय् जुइगु याःसां नेवाःतय्सं छ्यलीगु थीथी अय्लाः थ्वँया महोत्सव जुइत्यंगु धाःसा थ्व न्हापांखुसी खः ।
महोत्सवय् अय्लाः थ्वँया लिसें ल्वसा कथं आलुछ्याना, गुन्द्रु, लाभा, पालु, वाउँ मल्ता छ्याना, कचिला, छ्वय्ला, जँला, दायेकाला लिसें समय्बजि नं दइ । अथे हे घःमरि, छुचुं मरि, ग्वारा मरि, ल्वंचा मरि, चतांमरि व यःमरि नं दइगु खँ धाःगु दु । नेवाः समाजय् अय्लाः थ्वँयात त्वनेत जक मखु थीथी सांस्कृतिक ज्याखँय् नं छ्यलीगु चलन दु ।
LEAVE YOUR COMMENTS