नखः न्ह्यःने वल, बजाः अनुगमन तीव्र

येँ (नेपालभाषा टाइम्स) – मोहनि, स्वन्ति, नेपाल संवत् न्हूदँ, छठ लगायतया पर्व न्ह्यःने थ्यंकः वःगु दु। नेपाःमितय् तःजिगु नखः न्ह्यःने थ्यनेवं नखया इलय् जुइगु बजाः अनुगमन नं तीव्र जूगु दु। स्वनिगःया स्वंगुलिं जिल्ला प्रशासन ज्याकूपाखें नखःया इलय् जुइगु कृत्रिम अभाव व स्वाभाविक रुपं खाद्यान्नय् जुइगु मूल्य वृद्धियात कयाः बजाः अनुगमनया ज्यायात तीव्रता बीगु जूगु दु ।

थन ‘स्वनिगःया बजाः अनुगमन व सुरक्षा व्यवस्था’ विषयय् अन्तरक्रिया ज्याझ्वलय् नवासें येँ जिल्लाया प्रमुख जिल्ला अधिकारी जनकराज दाहालं नखःया इलय् जुइगु खाद्यान्न्या कृत्रिम अभाव व मूल्यवृद्धियात वनेत नखःचखः केन्द्रीय अनुगमन याकनं शुरु यायेगु जुइ धयादिल । वय्कलं उकिया निंतिं स्वनिगःया स्वंगुलिं जिल्लाया सहायक प्रमुख जिल्ला अधिकारी दुथ्याःगु छगू समिति गठन यानागु नं जानकारी बियादिल ।

स्वम्हं सहायक प्रजिअयात जिम्मेवारी हे बियाः खाद्यान्न, कापः, वसः, यातायात लगायतया थासय् अनुगमन यायेगु नं धयादीगु दु। ज्याझ्वलय्वा णिज्य आपूर्ति व उपभोक्ता हकहित संरक्षण विभागया महानिर्देशक नेत्र सुवेदीं बजाः अनुगमनया निंतिं थःपिंसं आवंनिसें हे प्यंगू टोली गठन यानाः परिचालन यायेधुंगु धयादिल ।

नेपाल आयल निगमया कार्यकारी निर्देशक सुरेन्द्र पौडेलं नखःयात लक्षितयानाः पेट्रोलियम पदार्थ व एलपी ग्यास मौज्दात तयागु जानकारी बियादिल । अथे हे साल्ट ट्रेडिङ कर्पोरेसनया प्रबन्ध ब्रजेश झा नं नखःया निंतिं सहुलियत दरया पसः संचालन यायेगु जुइ धयादिल ।