ज्वेल्स सहकारीया वृहत् स्वास्थ्य शिविर

यल (नेपालभाषा टाइम्स)- ज्वेल्स बचत तथा ऋण सहकारी संस्थाया ग्वसालय् वृहत स्वास्थ्य शिविर जूगु दु । सहकारीया यल तःबहाःस्थित भवनय् जूगु स्वास्थ्य शिविर मिसा ल्वय्, मचा ल्वय्, छ्यंगू सम्बन्धी ल्वय्, क्वेँ सम्बन्धी ल्वय्, न्हाय्, न्हाय्पं व वा, मिखाया निःशुल्क परीक्षण जूगु खः । अथेहे इसीजी, भिडियो एक्सेरे, हिया जाँच नं निःशुल्क याःगु खः ।

काठमाडौं मेडिकल कलेजया प्राविधिक ग्वाहालि व लाइफ लाइन हेल्थ केयरया ग्वाहालिइ वृहत् स्वास्थ्य शिविर जूगु खँ सहकारीया कोषाध्यक्ष व ज्याझ्वः संयोजक प्रज्ञाराज शाक्यं कनादिल । लाइफ लाइनपाखें दछिया दुने यल महानगरपालिकाया फुक्कं वडाय् स्वास्थ्य शिविर यायेगु ग्वसाः कथं झिंप्यंगू शिविर न्ह्याकेधुंकूगु नं शाक्यं कनादीगु दु ।

समाजसेवी व सहकारीया महिला विभागया प्रमुख मोतिशान्ति शाक्यया पहलय् जूगु ज्याझ्वलय् स्वसलं मल्याक सहकारीया दुजःपिं व मेमेपिंसं स्वास्थ्य सेवा काःगु खः । सहकारीं थ्वयां न्ह्यः नं मिखा, मिसा ल्वय्, हि परीक्षण सम्बन्धी बिस्कं बिस्कं हे शिविर न्ह्याकेधुंकूगु खँ कनादिसें वय्कलं थ्व पालय् वृहत् रुपं थीथी ल्वय्या परीक्षण लिसें इसीजी, भिडियो एक्सरे, प्याथोलोजीया सुविधा सहित शिविर न्ह्याकागु खँ कनादिल ।

ज्वेल्स सहकारी छुं न्हि न्ह्यवनिसें स्वास्थ्य बिमासहितया बचत योजना नं हःगु खँ सहकारीया अध्यक्ष किरणभाइ बज्राचार्यं कनादिल । सहकारीइ स्वंगू लाख तक बचत यात धाःसा दँय् ५० हजार तका बराबरया बीमा जुइगु खँ वय्कलं कनादिल । सहकारीइ स्वंगू लाखया बचत यात धाःसा दछिया दुने छुं नं ल्वय्या परीक्षण यानाः, उपचार यानागु वा वासः यानागुया बिल हल धाःसा ५० हजार तका तकया ध्यबा सहकारी पुलाबी ।

अथेहे सहकारीं ३ वर्षया जीवन बिमा योजना नं न्ह्याकाच्वंगु दु । थ्व योजना कथं लय्लय् पतिकं निश्चित रकम बचत यात धाःसा स्वदँया दुने बचतकर्ताया मृत्यु जुल धाःसा निश्चित बीमा रकम लिसें बचत यानातःगु ध्यबा व ब्याज लित वइगु खँ नं नायः शाक्यं कनादिल ।

सम्बन्धित बुखँ

LEAVE YOUR COMMENTS