श्रीलंकाय् भारत बल्ला कि चीन ?

श्रीलंकाय् जारी जुयाच्वंगु राजनीतिक संकट थौंकन्हय् तसकं चर्चाय् दु । विदेशी मिडियां चीनयात थ्व संकटय् दुथ्याका स्वया हयेवं चिनिया मिडियां थुकिया आलोचना यानाहःगु दु ।चिनियाँ मिडियाया कथं चीन व भारतया निंतिं श्रीलंकाय् ग्वाहालि अप्वयेकेगु तःधंगु सम्भावना दु । चीनया विदेश मन्त्रालयं २९ अक्टोवरय् छगू वक्तव्य जारी यासें धाःगु दु, ‘चीन श्रीलंकाया सकलें पक्षलिसे मैत्रीपूर्ण सम्बन्ध दु ।

लिसें चिनं मेगु देया आन्तरिम मामिलाय् हस्ताक्षप मयायेगु सिद्धान्तयात न्ह्याबलें पालना याइ ।’ मन्त्रालयं सम्बन्धित पक्षलिसे खँल्हाबल्हा यानाः याकनं ल्वापु ज्यंकीगु आशा नं प्वंकूगु दु ।

संघाइ पाखें पिहां वइगु गुआंचा न्यूज वेबसाइटय् साउथ एशिया रिसर्चर लोंग जिंगचुनं छपु लेख च्वयाः धाःगु दु, ‘अन्तर्राष्ट्रिय मिडियां श्रीलंकाया आन्तरिक मामिलाय् चीन समर्थक व भारत समर्थक शक्ति दथुइ संघर्ष कथं न्ह्यथनातःगु दु, थ्व सत्य मखु । श्रीलंकाया सत्ताय् चाहे महिन्द्रा राजापाक्ष वयेमा, चाहे रनिल विक्रमासिंघे वयेमा, चीन व श्रीलंका दथुइ स्वापू न्ह्याबलें बांलाना हे च्वनी ।’

अथेहे चीनया सरकारी पत्रिका ग्लोबल टाइम्सं विश्लेषकतय् उद्ढृत यासें च्वःगु दु, ‘दक्षिण एशियाया चिधंगु देय् राजनीतिक हिउपाः पाखे न्ह्याः वनाच्वंगु दु । थज्याःगु इलय् भारत व चीनं श्रीलंकाय् ग्वाहालि यायेगु बारे बिचाः यायेमाः, न कि अन प्रभाव अप्वयेकेगु निंतिं प्रतिस्पर्धा यायेगु खः ।’

अथेहे चाइनिज एकेदेमि अफ सोशल साइन्सया एशोसियट रिसर्च फेलो लेओ शिआशुएं धाःगु दु, ‘श्रीलंकाय् राजापाक्ष प्रधानमन्त्री जुल धाःसा श्रीलंका भारतं तापाना वनी व चीन लिसे सती धकाः धयाच्वंगु दु, तर थ्व खँय् छुं सत्य मदु ।’मेखे ग्लोबल टाइम्सं च्वःगु दु, ‘राजापाक्ष श्रीलंकाय् सत्ताय् लिहां वःगु खं भारतयात चिन्ता याइगु स्वाभाविक खः ।

छाय्कि राजापाक्षया इलय् चीनं श्रीलंकाय् आधारभूत ढाँचाया विकासया निंतिं यक्व लगानी याःगु दु । राजापाक्ष लिहां वयेवं थज्याःगु योजनाय् हाकनं चीनया लगानी अप्वयेफु ।’थुकी च्वयातःगु दु कि श्रीलंकाय् भारतया भचा भचा प्रभाव ला दु, तर भारतं श्रीलंकायात चीनया लगानी कायेमते धकाः दबाब बीफइमखु । पत्रिकार च्वयातःगु दु, ‘यदि भारतं श्रीलंकाय् थःगु सक्रियता ल्यंकातयेगु खःसा चीनलिसे जानाः ज्या यायेमाः ।’