तलिबानं दारि खायेगुलि नं प्रतिबन्ध तल

एजेन्सी- अफगानिस्तानया हेलमन्ड प्रान्तय् तालिबानं दारि खायेगुलि नं प्रतिबन्ध तःगु दु । दारि सुचुक खायेत वा चिहाकः जुइक चायेत प्रतिबन्ध तःगु खः । तालिबानया धार्मिक प्रहरीं अथे यायेगु इस्लामिक कानुनया अःखः जुइगु व थ्व कानून हाचां गाःपिंत कारवाही जुइगु धाःगु दु ।

हेलमन्ड प्रान्तया दक्व सैलुनय् सँ व दारि चाःवइपिंसं शरिया कानूनया पालना यायेत निर्देशन बियाः सुचं तिकातःगु दु । अफगानिस्तानया राजधानी काबुलय् च्वंगु सैलुनय् नं थ्व निर्देशन वःगु सैलुनया सञ्चालकतय्सं धाःगु दु । तालिबानं हःगु थ्व कानूनं यानाः हजामतय्गु ज्याय् लिच्वः लाःगु दुसा अफगानिस्तानय् च्वंपिं मिजतय्सं मयः मयः हे दारि लहिनातयेमालीगु जूगु दु । तालिबानं न्हापा शासन याःबलय् नं थ्व नियम दयेकातःगु खः ।

तालिबानं न्हापासिबें फरक शासन यायेगु धाःसां व्यवहारय् धाःसा अथे खनेमदयाच्वंगु दु । तालिबानं आः नं न्हापा थें हे शासन याइगु खनेदु । निन्हु न्ह्यः तिनि तालिबानं अपहरण याःगु द्वपनय् प्यम्हेसित मृत्युदण्ड बियाः सार्वजनिक थासय् यखाःगु खः । अथे हे तालिबानं महिला मन्त्रालय नं खारेज यायेधुंकूगु दु । मिस्तय्त आखः ब्वंकेगु धाःसां नं तालिबानं व्यवहारय् लागु याःगु खनेमदुनि ।