कोरोनाया बन्दय् भ्यान गग्या पेन्टिङ खुया यन

येँ – कोरोना भाइरस संक्रमणया कारणं बन्द यानातःगु छगू म्युजियमं महान कलाकार भिन्सेन्ट भ्यान गगया अमूल्य पेन्टिङ खुया यंकूगु दु ।

द नेदरल्याण्ड्सया सिङ्गर लरेन म्युजियमय् ब्वयातःगु भ्यान गगया ‘द पारासोनेज गार्डेन एट न्युनेन इन स्पिङ’ नांया ऐतिहासिक पेन्टिङ खुया यंकातःगु खः । म्युजियमं थ्व पेन्टिङ ग्रोनिङ्गर म्युजियमपाखें थःथाय् ब्वयेगु लागिं धकाः छुं ईया लागिं हयातःगु खः ।

सोमवाः छगू पत्रकार सम्मेलन यासें सिङ्गर लरेन म्युजियमया निर्देशक जान रुडोल्फ डे लोर्मं थ्व घटनां थःत तसकं आघात लाकूगु खँ धाःगु दु । ‘थ्व घटना सिङ्गर व ग्रोनिङ्गर निगुलिं म्युजियमया लागिं दुर्भाग्य खः । तर व स्वयां नं दुःखया खँ धइगु थ्व पेन्टिङ अन तया तयागु धयागु समाजया लागिं खः, समाजय् लसता व उत्प्रेरणा बीगु लागिं खः,अझ थौंया थाकुगु इलय् भरोसा बीगु लागिं खः’ निर्देशक लोर्मं धाःगु दु ।

(ने. सं. ११४० चौलाथ्व ७/ वि. सं २०७६ चैत १८ मंगलवाः)