सर्वसाधारणयात स्यानाः तालिबानं युद्ध अपराध यात – अमेरिका व बेलायत

एजेन्सी- तालिबानतय्सं सर्वसाधारणयात स्यानाः युद्ध अपराध याःगु खँ अमेरिका व बेलायतं धाःगु दु । अफगानिस्तानया कान्दाहारया स्पिन बोल्डय् दर्जनसिबें अप्वः सर्वसाधारणयात स्याःगु अमेरिका व बेलायतं ठहर याःगु खः । सामाजिक सञ्जाल ट्विटरय् यानातःगु पोस्टय् अमेरिका व बेलायतं धाःगु दु ‘तालिबानतय्सं प्रतिरोधया नामय् सर्वसाधारणयात स्यानाः युद्ध अपराध याःगु दु । तालिवानया नेतृत्वं लडाकूतय्सं याःगु हत्याया जिम्मा कायेमा । छिकपिसं थः लडाकूतय्त नियन्त्रणय् कायेमफुसा सत्ताय् वयेबलय् गथे यानाः ज्याः यायेफइ ।’

अफगानीस्तानय् अमेरिकी व अफगानी सेनाया हवाइ हमला लिपा तालिबानया लडाकूतय्सं हेलमन्द प्रान्तया राजधानी लस्करय् हमला याःगु दु । सोमवाः अफगानीस्तानया सुचना व प्रशारण मन्त्रालयं हेलमन्दय् तालिबानतय्गु हमला व धम्कीं यानाः रेडियो व टिभी बन्द जूगु धाःगु दु । हेलमन्द प्रान्तया राजधानी लस्करयात तालिबानतय्सं कब्जाय् कायेत स्वयाच्वंगु दु ।

अमेरिकाया सेनां अफगानिस्तान त्वःताच्वंगु दुसा थ्व हे इलय् तालिबानतय्सं अफगानिस्तानया थीथी थाय् थःपिनिगु कब्जाय् कयाच्वंगु दु । अफगानिस्तानय् आः न्हिंन्हिं हे तालिबान व अफगानी सेना दथुइ थाय् थासय् युुद्ध जुयाच्वंगु दु ।

सम्बन्धित बुखँ

LEAVE YOUR COMMENTS