पारमाणविक हतियार विस्तार यायेगु ट्रम्पया ख्याच्वः

येँ – राष्ट्रपति डोनाल्ड ट्रम्प रुस व चीनयात दबाब बिइगु निंतिं अमेरिकां थःगु पारमाणविक हतियार भण्डार विस्तार यायेगु खँ धाःगु दु । पत्रकारतलिसे खँ ल्हासें ट्रम्पं मध्यम दूरीया पारमाणविक क्षेप्यास्त्र सम्बन्धी आइएनएफ सन्धियात रुसं उल्लंघन यानाच्वंगु द्वपं बिसें थथे जुल धाःसा थःपिंसं नं हतियार भण्डार विस्तार यायेगु ख्याच्वः बियादीगु खः ।

अमेरिकां न्हापां निसें रुसं आइएनएफ सन्धि उल्लंघन याना वयाच्वंगु द्वपं बिया वयाच्वंगु खः । राष्ट्रपति ट्रम्पं धयादीगु दु, ‘मनूतय् चेत खुले मजुतले अमेरिकां अस्त्र भण्डारी विस्तार याइगु जुइ । थ्व सकसिगुं निंतिं ख्याच्वः खः । थुकी रुस नं लायेफु, चीन नं लायेफु । थुपिं लिसें मेपिं नं लायेफु, गुपिं थ्व खेल म्हिते चाहे जूपिं खः । रुसं थ्व सन्धिया मर्म अथवा सन्धिया हे पालना याःगु मदु ।’

थ्वयां न्ह्यव वय्कलं अमेरिका नं थ्व सन्धिपाखें लिचिलेफुगु धम्की बिइधुंकूगु दु । शीतयुद्धकालया थ्व सन्धिइ मध्यम दूरीया क्षेप्यास्त्र विकासय् प्रतिबन्ध तयातःगु दु । रुसं धाःसा थःपिंसं आइएनएफ सन्धिया उल्लंघन मयानागु खँ धया वयाच्वंगु दु । थुकिया लिसें रुसं यदि अमेरिका अस्त्र भण्डारी विस्तार यात धाःसा थःपिंसं उचित लिसः बीगु ख्याच्वः बिउगु दु ।

थ्वहे दथुइ अमेरिकी राष्ट्रिय सुरक्षा सल्लाहकार जन बोल्टन धाःसा अमेरिकां आइएनएफ सन्धि पाखें लिचिलेगु धकाः धाःगुयात कयाः मस्को वार्ता यानाच्वंगु दु । पारमाणिक शक्ति सन्तुलनया निंतिं माःगु पलाः न्ह्याकेत थःपिं तयार दु धासें मस्कों नं ख्याच्वः बिया हयेवं अमेरिकी राष्ट्रिय सुरक्षा सल्लाहकार बोल्टन रुस भ्रमणय् वंगु खः ।

क्रेम्लिनया प्रवक्ता दिमित्रि पेस्कोभं धाःगु दु, ‘थ्व विषयय् जिमिसं अमेरिकाया धापु न्यने चाहे जुयाच्वनागु दु । सन्धि खारेज जुल धाःसा रुसं थःगु सुरक्षाया निंतिं पलाः ल्ह्वनेमाःगु जुइ ।’ रुसी सुरक्षा परिषद्या सचिवं आइएनएफ सन्धिया बारे निगू देय् दथुइ दयाच्वंगु वैमनष्यता चिइकेगु निंतिं अमेरिकालिसे जानाः ज्या यायेत क्रेम्लिन तयार दुगु खँ धाःगु दु ।