ने. सं. ११४४ कछलागा सप्तमी -

म्यानचेस्टर युनाइटेड पराजित

युइएफए च्याम्पियन्स लिगया म्हिगः चान्हय् जूगु कासाय् युभेन्टसं म्यानचेस्टर युनाइटेडयात बुकूगु दु । समूह ‘एच’ अन्र्तगत जूगु कासाय् युभेन्टसं म्यानचेस्टर युनाइटेडयात वयागु हे मैदानय् १–० गोलं बुकूगु खः । न्हापांगु हाफया १७ औं मिनेटय् क्रिष्टियानो रोनाल्डोया पासय् पाउलो डिबालां छगू जक गोल याःगु खः ।

रोनाल्डो युनाइटेडया पुलांम्ह कासामि खः । थ्व समुहय् हे लाःगु योङ ब्वाइज व भ्यालेन्सिया दथुया कासा १–१ गोलया बराबरीइ क्वचाल । थ्व समूहया स्वंगुलिं कासा त्याकाः युभेन्टस शीर्ष थासय् दु ।मेखे समुह ई अन्तर्गत जूगु कासाय् बार्यन म्युनिख व अजाक्स त्याःगु दु । जर्मन क्लब बार्यन म्युनिखं एइके एथेन्सयात २–० गोल व अजाक्सं बेन्फिकायात १–० गोलं बुकूगु खः।

एइके एथेन्सया मैदानय् जूगु कासाय् म्युनिखया निंतिं मार्टिनेजं ६१ औं मिनेटय् व लेवान्डोस्की ६५ आंै मिनेटय् छगू छगू गोल याःगु खः । अथेहे बेन्फिकायात अजाक्सं माज्रजओइं इन्जुरी इलय् याःगु छगू जक गोलं बुकूगु खः । अजाक्स समूहया शीर्ष थासय् दु ।अथेहे समुह ‘एफ’य् म्यानचेस्टर सिटीं शाख्तर डोनेस्कयात ३–० गोलं बुकूगु दु ।

सिटीं न्हापांगु हाफ निगू व लिपांगु हाफय् छगू गोल याःगु खः । सिटीं कासाया ३० आंैं मिनेटय् डेभिड सिल्भाया गोलया ग्वाहालिं अग्रता काःगु खः । कासाया ३५ औं मिनेटय्् एम्रिक लार्पोट गोल यानाः सिटीयात निगू गोलया अग्रता बिउगु खः । निगूगु हाफय् बर्नाडो सिल्भां थप छगू गोल याःगु खः । सिटी समुहया शीर्ष थासय् दुसा पराजित जूगु डोनेस्क समूहया अन्तिम थासय् दु ।

थ्व हे समूहय् च्वंगु लियोन व होफेनहेम दथुया कासा ३–३ गोलया बराबरीइ क्वचाःगु दु । समुह ‘जी’ पाखे रियल म्याड्रिडं भिक्टोरिया प्लेजनयात २–१ गोलं बुकल । रियलं न्हापांगु हाफय् छगू व लिपांगु हाफय् छगू गोल याःगु खः । रियलया निंतिं कासाया ११ औं मिनेटय् करिम बेन्जिमा व ५५ औं मिनेटय् मार्सेलाें छगू छगू गोल याःगु खः ।

भिक्टोरियापाखें छगू जक गोल हरोसोभ्स्कीं याःगु खः । फुक्क कथंया धेंधेंबल्लाखय् यानाः लगातार प्यंगू कासाय् पराजित जूगु रियल म्याड्रिड च्याम्पियन्स लिगय् भिक्टोरियायात बुकाः पराजयय् दिपा कायेत ताःलाःगु खः । थ्व हे समूहया मेगु कासाय् रोमां सिएसकेए मस्कोयात ३—० गोलं बुकल । निगू कासा त्याकेधुंकूगु रियल थ्व समूहय् शीर्ष थासय् दु ।