नेपाःया राष्ट्रिय क्रिकेट टिमया प्रशिक्षण शुरु

येँ – नेपाःया राष्ट्रिय क्रिकेट टिमया बन्द प्रशिक्षण मंगलवाःनिसें किपूया त्रिवि मैदानय् शुरु जूगु दु । स्पेनय् जुइत्यंगु आइसीसी क्रिकेट विश्वकप लिग २ या त्रिकोणात्मक सिरिजया निंतिं प्रशिक्षण शुरु जूगु खः । थ्व प्रशिक्षणय् १९ म्ह कासामिं ब्वति कयाच्वंगु दु । नेपाल क्रिकेट संघं प्रशिक्षणया निंतिं २० म्ह कासामि सःतूगु खःसा पृथु बास्कोटां व्यक्तिगत कारणं ब्वति मकाःगु खः । नेपाःया क्रिकेट टिमयात प्रशिक्षक डेभ वाटरं प्रशिक्षण बिइ ।

आइसीसी क्रिकेट विश्वकप लिग २ या त्रिकोणात्मक सिरिजय् नेपालं स्कटल्याण्ड व नामिबियालिसे कासा म्हिती । सिरिज जुलाईया अन्तिमय् जुइ । थ्व सिरिज स्कटल्याण्डय् जुइमाःगु खःसां कोरोनाया कारणं स्पेनय् जुइत्यंगु खः । आइसीसी क्रिकेट विश्वकप लिग २ लय् नेपालं ओमन व अमेरिकालिसे म्हितेधुंकूगु दु । लिगय् नेपालं प्यंगू कासा म्हितेधुंकूगु दुसा ४ अंक सहित नेपाः खुगुगू थासय् दु । झिगू कासा म्हितूगु ओमन शीर्ष थासय् दु । मेखे ओमन, अमेरिका व नेपाःया दथुइ जुइमाःगु कासा कोरोनाया कारणं स्थगित जुयाच्वंगु दु ।

प्रशिक्षण शुरु जुइ न्ह्यः ब्वति काःपिं दक्व कासामि व अफिसियलतय्गु कोरोना टेस्ट जूगु खःसा दक्वसिगु रिपोर्ट नेगेटिभ वःगु खः । प्रशिक्षणया निंतिं कप्तान ज्ञानेन्द्र मल्ल, सन्दीप लामिछाने, पारस खड्का, कुशल भुर्तेल, दीपेन्द्र सिंह ऐरी, शरद भेषवाकर, आरिफ शेख, कुशल मल्ल, विनोद भण्डारी, करण केसी, सोमपाल कामी, कमल सिंह ऐरी, अविनाश बोहोरा, सुशन भारी, विक्रम सोब, पवन सर्राफ, सन्दीप जोरा व शाहब आलमं ब्वति काःगु दु ।