फेडेरर व नाडालं फ्रेन्च ओपनया सेमिफाइनलय् म्हितीगु

रोजर फेडेरर व राफेल नाडाल फ्रेन्च ओपनया सेमिफाइनलय् प्रवेश याःगु दु । क्वार्टरफाइनलय् स्वीस कासामि फेडेररं थःगु हे देय्या स्टानिसलास वावरिन्कायात व नाडालं जापानया केइ निशिकोरीयात बुकाः सेमिफाइनलय् प्रवेश याःगु खः । आः सेमिफाइनलय् फेडेरर व नाडाल दथुइ धेंधेंबल्ला जुइ ।

फेडेररं वावरिन्कायात ७—६ (७—४), ४—६, ७—६ (७—५) व ६—४ या सेटं बुकाः सेमिफाइनलय् थाय् दयेकूगु खः । नीक्व तकया ग्राण्डसलाम विजेता फेडेररयात कासा त्याकेत ३ घण्टा व १७ मिनेट ई माल । अथेहे मेगु सेमिफाइनलय् नाडालं निशिकोरीयात ३–० या तप्यंगु सेटं बुकल । नाडालं ६—१, ६—१ व ६—३ या सेटं कासा त्याकूगु खः ।

फेडेररं उपाधि हे ल्हातये लायेधुंकाः जक थःगु म्हगस पूवनीगु खँ धाःगु दु । फेडेररं वंगु निगू दँय् झ्वलाक क्वार्टरफाइनलय् पराजित जूगु खः । नाडालं सेमिफाइनलय् फेडेरर नापया धेंधेंबल्लाः विशेष जुइगु व उकीया निंतिं थः उत्साहित दुगु खँ धाःगु दु ।नाडाल व फेडेरर दथुइ ३८ क्वः धेंधेंबल्लाः जुइधुंकूगु दु ।

नाडाल २३ क्व त्याःगु दुसा फेडेरर १३ क्व जक त्याःगु दु । फ्रेन्च ओपनय् नाडाल व फेडेररया थ्व खुक्वःगु धेंधेंबल्लाः खः । फ्रेन्च ओपनय् फेडेररं नाडालयात आःतक बुकेफुगु मदुनि । नाडालं झिंछक्व फ्रेन्च ओपन उपाधि त्याकेधुंकूगु दुसा फेडेररं मुक्कं छक्व जक थ्व उपाधि त्याकूगु दु ।