वार्ता पाखें समस्या समाधान यायेगु जुइ – भारतीय रक्षामन्त्री

येँ – भारतया रक्षामन्त्री राजनाथ सिंहं नेपाल–भारत सीमा विवादया समाधान वार्तापाखें मालेगु खँ धयादीगु दु । म्हिगः भारतीय जनता पार्टीया उत्तरखण्डया कार्यकर्तातय्त सम्बोधन यायेगु झ्वलय् वय्कलं उगु खँ धयादीगु खः ।

सम्बोधनया झ्वलय् रक्षामन्त्री सिंहं नेपाल–भारतया दथुइ रोटी–बेटीया सम्बन्ध दुगु व उकियात सुनां नं त्वाःथले मफइगु खँ धयादीगु दु । सम्बोधनया झ्वलय् वय्कलं धयादिल, ‘लिपुलेकं धार्चुला स्वाइगु सतकयात कयाः नेपालय् छुं गतल बुझाइ दु उकियात सम्वादं हे ज्यंकेगु जुइ ।’

भारतया नेपाःलिसे सामाजिक, भौगोलिक, ऐतिहासिक व सांस्कृतिक जक मखुसे आध्यात्मिक सम्बन्ध दुगु धासें गोरखा रेजिमेन्ट सेनां इलय् ब्यलय् थःगु शौर्यया म्हसिका नं बियाच्वंगुलिं नेपाः लिसेया स्वापू त्वाःमदइगु खँ धयादिल ।

वय्कलं धयादीगु दु, ‘जिं विश्वास यानाः धाये भारतीयया नुगलय् गुगु नं इलय् नेपाःया विषयय् गुगुं नं कथंया कटुता ब्वलनी मखु, झीगु नेपाः लिसे थुलि क्वातुगु स्वापू दु, फुक्कं समस्याया समाधान वार्ता व सम्वादपाखें जुइ ।’