भारतया पत्रिका ‘दैनिक भास्कर’य् आयकरया छापा
एजेन्सी÷ भारतया छगू नांजाःगु पत्रिका ‘दैनिक भास्कर’या ज्याकुथिइ सेन्ट्रल बोर्ड अफ डाइरेक्ट ट्याक्सेजं ( सीबीडीटीं) बिहिवाः सुथय् छापा मारे याःगु दु । सीबीडीटीया प्रवक्ता सुरभी अहलुवालियां थुकिया जानकारी बिउगु खः । प्रवक्ता अहलुवालियां ‘दैनिक भास्कर’या ज्याकुथिइ छानबिन जुयाच्वंगु धाःगु दु । अहलुवालियां आःयात छापाया विषययात कयाः मेगु छु नं धाये मछिंनिगुु प्रतिक्रिया बिउगु दु ।
‘दैनिक भास्कर’या नेसनल एडिटर लक्ष्मी प्रसाद पन्तं पत्रिकाया जयपुरय् च्वंगु ज्याकुथिइ सीबीडीटीया न्याम्हेसिगु टिमं छानबिन यानाच्वंगु खःसां छुकिया छानबिन यानाच्वंगु खः थम्हं मसिउ धाःगु दु ।
भारतया विपक्षी नेतातय्सं सीबीडीटीं पत्रिकाय् याःगु छापाया विरोध याःगु दु । दिल्लीया मुख्यमन्त्री अरविंद केजरीवालं पत्रिकाय् आयकरं छापा मारे यानाः मिडियातय्त ख्यायेत स्वःगु धाःगु दु । केजरीवालं ट्विट यासें भाजपा सरकारया विरुद्ध नवाःपिंत सरकारं मत्वःतीगु बिचाः ग्यानापुगु व थुकिया बिषययात कयाः सः तयेमाःगु धाःगु दु । केजरीवालं छापा तुरुन्तं बन्द यायेत नं माग याःगु दु ।
अथे हे कांगे्रसया नेता कमलनाथं नं मोदी सरकारं प्रजातन्त्रया प्यंगूगु स्तम्भयात क्वत्यलेत स्वःगु धाःगु दुसा मेम्ह नेता दिग्विजय सिंहं पत्रकारिताय् मोदीशाहं प्रहार याःगु धाःगु दु । राजस्थानया मुख्यमन्त्री अशोक गहलोतं मोदी सरकारया विरोधय् ट्विट याःगु दु ।
‘दैनिक भास्कर’ पत्रिकां मोदी सरकारं कोरोना महामारीया इलय् बांलाक ज्या मयाःगु द्वपं बियाः समाचार पित बियावयाच्वंगु खः ।
LEAVE YOUR COMMENTS