लुम्बिनी बौद्ध विश्वविद्यालय उत्कृष्ट बौद्ध अध्ययन केन्द्र

देय्या छगूयां छगू जक बौद्ध विश्वविद्यालय लुम्बिनी बौद्ध विश्वविद्यालयया स्थापना २०६२ सालय् जूगु खः । थ्व विश्वविद्यालयं म्हो अवधिया दुने हे प्रकाण्ड बौद्ध विद्वान उत्पादन याइगु महत्वपूर्ण केन्द्रया रुपय् न्ह्याः वंगु दु ।

सरकारपाखें उगु विश्वविद्यालय स्थापना जूगु ताःईतक छगू चीधंगु भवनपाखें संचालन जुया वयाच्वंगु व म्हो बजेटया बावजुद नं थ्व विश्वविद्यालयय् झिंप्यदँया अवधिइ बौद्ध धर्म अध्ययन यानाः विद्यावारिरि याःपिनिगु ल्याः झिंच्याम्ह थ्यने धुंकूगु दुसा ग्वीस्वम्हेसिनं बौद्ध दर्शन कयाः स्नात्तकोत्तर तह उत्तीर्ण यायेत सफल जूगु दु ।

लुम्बिनी बौद्ध विश्वविद्यालय, नेपाल परम्परागत बौद्ध धर्म संघ व त्रिरत्न कोषया मंकाः तत्वावधानय् वंगु छुं दिं न्ह्यः ग्वसाः ग्वःगु ज्याझ्वलय् लुम्बिनी बौद्ध विश्वविद्यालयया उपकुलपति प्रा. डा. नरेशमान वज्राचार्यं विश्वविद्यालयया न्हापांम्ह कुलपति डा. तुल्सीराम वैद्यं नेतृत्व यानादीगु इलय् शुन्यपाखें शुरु जूगु थ्व विश्वविद्यालय थौंया अवस्थाय् तक थ्यंगु इलय् तःधंगु हिउपाः हयेत सफल जूगु दु धयादिल ।

भगवान गौतम बुद्धया सन्देश विश्वन्यंकभनं थ्यंकेगु व गौतम बुद्धया बौद्धग्रन्थत अध्ययन अध्यापनयात प्रवद्र्धन याना यंकाः अन्तर्राष्ट्रियस्तरया छगू उत्कृष्ट बौद्ध अध्ययन केन्द्रया रुपय् स्थापित यायेगु परिकल्पना याःगु दु ।

प्रा. डा. वज्राचार्यं विश्वविद्यालयं प्राज्ञिक गुरुयोजना, मानव संशाधन गुरुयोजना, भौतिक पूर्वाधार गुरुयोजना व वित्तीय गुरुयोजना तर्जुमा यानाः लागू यानागु जानकारी बियादिल । विगतय् थेरवाद बौद्ध धर्म, महायान बुद्ध धर्म, एप्लाइड बुद्ध धर्म, बुद्धिज्म एण्ड हिमालयन स्टडीज व बुद्धिज्म एण्ड पीस स्टडिज अध्ययनय् जक सीमित जुयाच्वंगु विश्वविद्यालयय् लिपांगु इलय् गुंगू विषय थप यानाः मुक्कं झिंप्यंगू विषय अध्ययन जुयाच्वंगु वय्कलं धयादिल ।

त्रिभुवन विश्वविद्यालयया पुलांम्ह उपकुलपति डा. कमलकृष्ण जोशीं लुम्बिनी बौद्ध विश्वविद्यालयया स्थापनाकालय् पूर्वाधार शुन्य दुुगु व बजेट नं मदुगु धासें थः त्रिवि विश्वविद्यालय अनुदन आयोगया अध्यक्ष जुयाच्वनागु इलय् न्हापांखुसी छगू करोड तका दां बजेट निकासा यानागु खँ लुमंकादिल ।

लुम्बिनीइ जन्म जुयाबिज्याःम्ह भगवान गौतम बुद्धया सन्देश विश्वन्यंकभनं थ्यंकेगु व गौतम बुद्धया बौद्धग्रन्थत अध्ययन अध्यापनयात प्रवद्र्धन याना यंकाः अन्तर्राष्ट्रियस्तरया छगू उत्कृष्ट बौद्ध अध्ययन केन्द्रया रुपय् स्थापित यायेगु परिकल्पना याःगु दु । विश्वविद्यालय दकलय् न्हापां न्याम्ह शिक्षण सहायक व छम्ह उपप्राध्यापकया दरबन्दीं शुरु जूगु खः ।

विश्वया थीथी ५२ गू विश्वविद्यालय व बौद्ध संस्थाया अध्ययन यानाः लुम्बिनी बौद्ध विश्वविद्यालयया गुरुयोजना तर्जुमा याःगु खः ।
लुम्बिनी बौद्ध विश्वविद्यालयया पुलांम्ह उपकुलपति डा. त्रिरत्न मानन्धरं भृकुटीमण्डपा चिकिचाकूगु क्वथां शुरु जूगु लुम्बिनी बौद्ध विश्वविद्यालय बुद्ध धर्मया अध्ययनकर्ताया निंतिं खुल्ला पाठशालाया रुपय् विकास जूगु खँय् लसता प्वंकादी ।

नेपाल परम्परागत बौद्ध धर्म संघया न्वकु मञ्जुश्रीरत्न वज्राचार्यं बुद्धया जन्मस्थल लुम्बिनीइ बौद्ध विश्वविद्यालयया स्थापना लिपा बौद्धग्रन्थ अध्ययन याइपिं जिज्ञासुतय् निंतिं ज्ञान प्राप्त यायेगु ह्वःताः चूलाःगु धयादी ।

 

सम्बन्धित बुखँ

LEAVE YOUR COMMENTS