खुलामञ्च चायेकेत ज्या न्ह्यात

येँ – दरवार हाइस्कुल व वीर अस्पताल निर्माणया लागिं हयातःगु निर्माण सामग्री मुंकातःगु कारणं बन्द जुयाच्वंगु खुलामञ्च आः येँ महानगरपालिकां हानं खुल्ला यायेगु ज्या न्ह्याकूगु दु । खुलामञ्च बन्द यानाः आः निर्माण सामग्री मुंकल धकाः येँ मनपाया विरोध जुया वयाच्वंगु खः ।

खुलामञ्च खुल्ला यायेगु लागिं मनपां डोजर हे छ्यलाः अन मुनाच्वंगु निर्माण सामग्री चीकेगु ज्या शुरु याःगु दु । येँ मनपाया मेयर विद्यासुन्दर शाक्यं कनादी कथं आः वीर अस्पताल व दरवार स्कुल निगुलिं दयेके सिधःगुलिं उमित खुलामञ्चय् मुनाच्वंगु सामान याकनं यंकि धकाः जानकारी बीधुंकूगु दु । वय्कलं धयादिल, ‘थ्व वय्कःपिंत धयाच्वने माःगु खँ ला मखु, थुकिं यानाः जिमित तिंख्यः मिया नइपिं धकाः तक आरोप वःगु वय्कःपिंसं बांलाक हे सिउ । जिमिसं वय्कःपिंत ग्वाहालि यानागु दु, आः सफा यायेत नं वय्कःपिंसं जिमित ग्वाहालि यायेमाः ।’

यदि वीर अस्पताल व दरवार स्कूलया सामान इलय् हे मचीकल धाःसा मनपां हे चीका छ्वयेगु खँ नं वय्कलं कनादीगु दु । मेयर शाक्यं मनपाया नीति धइगु खुलामञ्च छगू जक खुल्ला यायेगु मखु, येँ दुने गुलि नं खुल्ला थाय्त दु, अन जुयाच्वंगु कब्जा मुक्त यानाः फुक्क हे खुल्ला थाय्त खुल्ला यायेगु खः धकाः नं स्पष्ट यानादिल ।

थौंकन्हय् थीथी राजनीतिक पार्टीतय्सं सार्वजनिक सतकय् हे आमसभा यानाः यातायात अस्तव्यस्त यानाच्वंगुलिं आः खुलामञ्च खुल्ला जुल धाःसा अन हे आमसभा याये फइगु व थुकिं सार्वजनिक यातायात प्रभावित मजुइगु आशा नं यानातःगु दु ।

सम्बन्धित बुखँ

LEAVE YOUR COMMENTS