राजीनामा बिउम्ह रावल न उखे, न थुखे

येँ – म्हीग आवेशय् वयाः सांसद पदं राजीनामा बियादीम्ह एमाले उपाध्यक्ष भीम रावलया राजीनामा आः तक स्वीकृत मजूनि । लिसें वय्कःयात आः तक राजीनामा लित का धकाः सुनां धाः वंगु नं मदुनि । थुकिं यानाः वय्कः थ्व इलय् एमाले दुने नं ओली खेमायाम्ह खः लाकि नेपाल खेमायाम्ह खः धइगु खँ स्पष्ट मजूनि ।

म्हीग राजीनामा बी न्ह्यः तक वय्कःयात नेपाल पक्षं राजीनामा लित कायेत इनाप याःगु खःसां आः देउवायात विश्वासया मत वयेधुंकाः धाःसा नेपाल खेमां वय्कःयात ह्ययेकेगु त्वःतूगु दु ।

एमालेया निगू गुटया एकताया लागिं नीस्वंगु कार्यदलया दुजः समेत जुयादीम्ह वय्कलं लिपांगु इलय् ओलीलिसे तःक्वःमछि याकः याकः वार्ता नं याःगु खः । थ्व वार्ता लिपा वय्कःया भाय् पाना वःगु खँ नेपाल पक्षया नेतातय्सं धाःगु दु ।

माधव पक्षया नेतातय् भेलाय् दकलय् अप्वः उग्र जुयाः रावलं आः थःपिं मेगु हे पार्टी चायेकाः न्ह्याः वनेमाः धकाः बिचाः तयादीगु खः । उकिया लागिं वय्कलं विधान मस्यौदा याइम्ह मनू समेत माला हःगु खः । अबलय् अथे धाःम्ह मनू आः वयाः ओलीया हे खँ न्यनाः पल्टे जूगु खनाः माधव पक्षया नेतात अजूचायाच्वंगु दु । नेता भीम
रावल ओली खेमाय् नं दकलय् मयःम्ह नेता खः ।